nyhende
Tenk tryggleik under hummerfisket
Kvart år rykker redningsskøytene ut til hummerfiskarar som får problem – ofte i dårlig vêr. Når sesongen no startar, minner Redningsselskapet om at god planlegging og riktig utstyr kan vera avgjerande.
Dei siste fem åra har sju menn omkome i samband med hummerfiske i Noreg. Kvart år får ei rekke hummerfiskarar problem under setting og trekking av teiner. Det merkar Redningsselskapet på oppdragsstatistikken, skriv dei i ei pressemelding.
Tau i propellen
Tau i propellen er den vanlegaste årsaka til at redningsskøytene må rykka ut under hummerfisket. Slike framdriftshavari fører ofte til farlege situasjonar, der båten driv mot land eller ut på ope hav.
– Riktig utstyr er sjølvsagt heilt essensielt. Redningsvest er eit minimum. No, når temperaturane er låge i både lufta og vatnet, er flytedress eller arbeidsdrakt å føretrekka, seier Lars Petter Helminsen, skipper på redningsskøyta «Stormbull».
Gode tips
Redningsselskapet har 8 tips til deg som skal delta på haustens vakraste eventyr:
Ha ein plan: Vatnet er kaldt, og uten riktig utstyr overlever du berre få minutt. Ha derfor ein plan for korleis du kan unngå å hamna i sjøen – og kva du skal gjera om det likevel skjer.
Tenk stabilitet og tauverk: Unngå høge stablar med teiner om bord – deI reduserer stabiliteten. Ver ekstra merksam på tauverk. Mange oppdrag under hummerfisket handlar om tau i propellen, noko som raskt kan føra til motorstans og at båten driv på land.
Bruk redningsvest: Alle om bord skal bruka vest. På hausten og vinteren er ei flytedrakt eller arbeidsdrakt det tryggaste valet.
Varslingsmogelegheit: Ha alltid med deg mobil i vasstett pose eller ein bærbar VHF-radio. Om du fiskar aleine, kan ein personleg nødpeilesendar vera livsviktig.
Kniv på kroppen: Skulle du setta deg fast i tauverk, kan kniven vera di einaste moglegheit til å skjera deg laus. Ha den på kroppen, ikkje i styrhuset.
Ha anker klart: Eit godt anker kan vera avgjerande dersom båten mister framdrifta. Ha det lett tilgjengeleg.
Kle deg godt: Bruk trelagsprinsippet og ull innerst. Ein vindtett og vassavvisande flytedress held deg varm og trygg.
Meld frå kvar du drar: Bruk gjerne Redningsselskapet sin gratis-app SafeTrx. Den varslar automatisk pårørande om du ikkje kjem tilbake som avtalt.
