Telenor åtvarar mot ny svindeltrend

I ei pressemelding beskriv selskapet utviklinga som ein ny trend. I mange tilfelle er det snakk om skadeleg programvare som er laga for å stele sensitiv informasjon.

Oftare enn før oppdagar Telenor at slik programvare blir spreidd via påståtte instruksjonsvideoar på plattformer som YouTube, Instagram og TikTok.

– Dersom ein følgjer instruksjonane i slike videoar, endar ein med å installere skadevare som gir kriminelle tilgang til heile ditt digitale liv som nettbanken, e-posten og digitale løysingar du bruker på jobb, seier Birgitte Engebretsen, administrerande direktør i Telenor Noreg, i ei fråsegn.

Dei siste månadene er eit aukande tal forsøk på å installere denne typen skadevare vorte blokkert av Telenors filter. Samtidig har det vore færre forsøk på såkalla phishing, der kriminelle prøver å lure deg til å gi frå deg personleg informasjon.

Samla sett blokkerte Telenor 628 millionar utrygge nettsider og forsøk på digital kriminalitet i tredje kvartal.