nyhende
Sveio-prestar på utstilling
Blant alle utstillarane på utdanningsmessa på Stord, har også Den norske kyrkja i Sunnhordland ein stand. På opningsdagen var denne standen bemanna av to Sveio-prestar, Arild Steinsland og Runar Larsen.
Steinsland er sokneprest i Sveio, medan Larsen er fødd, oppvaksen og busett i kommunen. Han arbeidar som ungdomsprest i Stord.
– Det er Runar som har organisert det som har med standen å gjera, sett opp vaktlister og slikt, seier Steinsland til Vestavind.
Ei god oppleving
Han karakteriserer møtet med ungdommane på messa som ei god oppleving.
– Ein del stoppa og stilte spørsmål. Andre tok me kontakt med og fortalte om utdanningsløp og jobbtilbod i kyrkja. Dei som ville, fekk også tenna lys på globen me hadde med oss, fortel soknepresten vidare.
Siste dag i dag
Utdanningsmessa på Stord opna i går, onsdag. Messa er også open i dag, torsdag. Då vil andre kyrkjeleg tilsette enn prestar stå på standen og presentera sine arbeidsoppgåver, fortel Steinsland.
Han var også med på utdanningsmessa for to år sidan, og meiner det var første gong Den norske kyrkja var representert i denne samanhengen.
