Sveio-gutane vart seriemeistrar

— Spelarane var særs glade etter kampen, seier trenar Vegard Tollaksen.

SVEIO – KOPERVIK 6-0:

Saman med Espen Hovland Johannessen er han trener for ei spelargruppe beståande av rundt 20 gutar fødde i 2008 og 2009 som har spelt på same lag i G13-serien i år.

Og det er ein talentfull gjeng som onsdag kveld vart seriemestrar i 3. divisjon for G13-lag. I avdelinga har dei møtt lag frå Vard Haugesund, Nedstrand, Nord, Åkra, Skudenes og to lag frå Haugar. Etter at dei 16 serierundane no er ferdigspelt var det særs tett i toppen av tabellen, og Sveio var nøydd til å vinne siste kampen mot Kopervik for å vinne serien.

Nervar før siste kamp

Tollaksen seier at han i trenargjerninga si ikkje har tenkt så mykje på tabellen gjennom året, men at spelarane har følgd nøye med.

— Me trenarane merka at det var litt ekstra nervar ute og gjekk, seier Tollaksen.

Men det skule vise seg å vere liten grunn til å vere nervøs. Då dommaren blæs av kampen hadde dei heilraude skåra seks mål. Kopervik gjell mållause av banen. Dermed kunne dei sleppe jubelen laus. For Sveio vart seriemeister med 32 poeng, eitt lite poeng framfor Vard Haugesund på 2. plass, og to poeng framfor Nedstrand som blei nummer tre.

Tollaksen fortel at dei spelte cup i Haugesund sist helg, mot lag frå høgare nivå. Då gjekk det ikkje like bra resultatmessigt, og at sigeren – og seriemeisterskapet – nok difor smakte ekstra bra.

Treningsvillige

Han fortel at G13-gjengen har spelt saman lenge. Dei var først delt i to, som eit Vikse-lag og eit lag frå Sveio sentrum-området, men dei var vart slått samen då dei vart så gamle at dei byrja med 9-erfotball. Gjennom pandemien har dei heldt fram med å spele fotball i høve til reglane som ein kvar tid gjaldt for barneidretten.

— Ei stund var det jo 100 prosent stopp for alt grunna smittevernrestriksjonane. Men etter kvart som det opna opp trena me med ball utan at me var borti kvarandre, men med fokus på pasning og teknikk, fortel han.

Gutane trener tre gonger i veka utanom kampsesongen. I sesong stiller dei på to treningar i veka pluss kamp.

Han skryt elles av både spelarar og føresette som i mangel av ein fotballhall, syt for å måke bana om det trengs, slik at treningsivrige gutar har eit tilbod.

Håpar på juniorlag

A-laget til Sveio IL har som kjent hatt ein særs sterk haust på fotballbanen, og har ambisjonar om opprykk frå 6. divisjon neste år. Men klubben har ei utfordring når det gjeld rekruttering frå yngre rekker. For mellom dei ferske seriemeistrane på G13-laget og A-laget finst det ingen lag.

— Men me trur me skal klare å halde på denne gjengen, og målet er heilt klart å få til eit juniorlag på sikt, seier Tollaksen.