– Sveio er eit godt potensiale for KrF

Ti kommunar på to dagar. Valkamp kan bety lange, men òg innhaldsrike dagar for politikarane som gjerne vil ha flest mogleg frå sitt parti inn på Stortinget. Status for KrF er at dei i dag har åtte representantar inne, éin frå Hordaland. Lokalt i Sveio var oppslutnaden 7,6 prosent førre stortingsval.

Vil enda fleire stemma gult denne gongen? Det håpar sjølvsagt Dag Inge Ulstein og resten av følgjet som møtte lokal KrF-ar, Sondre Natås Strand på Strando i Førde sist veke. Lokalmedlemmet representerer også ei gruppe som er stor i Sveio-samfunnet – småbarnsforeldre.

Kontantstøtte

– Sveio er eit godt potensiale for KrF. Det er viktig med ein god familiepolitikk, ei oppvekst varer livet ut. Familiar må styrkast, ikkje styrast, seier Ulstein. Han er statsråd i regjeringa, og 1. kandidat på lista til Hordaland KrF.

Nokre parti er klare på at dei vil ta bort kontantstøtta, som gir familiar moglegheit til å ha barn mellom 1 og 2 år heime i staden for barnehage.

– Kontantstøtta er viktig for mange. Den kan verkeleg forsvinna om KrF ikkje får påverka, seier Ulstein.

Næringsutvikling

Verdibasert næringsutvikling og vekst blir også trekt fram som element i KrF sin politikk i denne samanhengen.

I framtida ser Strand gjerne at eit industrifelt i nærleiken av E39 med detaljvarehandel, mykje likt Heiane på Stord blir etablert i Sveio. Han trur ikkje det vil gå ut over området som er definert som sentrum i dag.

– Det er viktig å styrka sentrum med funksjonane, men òg veldig opptatt av liv i bygdene, med næring og attraktive buplassar. Eg trur det vil vera med og begrensa handelslekkasjen, seier Strand frå Sveio KrF.

– Det er god KrF-politikk. Og så får ein skapt arbeidsplassar og auka skatteinngongen på same tid, nikkar Ulstein.

Eldrebølgja

I tida som kjem vil det stadig vera fleire eldre i samfunnet med behov for omsorg. KrF har eit svar på korleis utfordringane skal møtast som dei trur kan bli ei god løysing.

– Me vil anerkjenna verdien pårørande har i eldreomsorga. Det me gir har verdi, seier Beate Husa, som er helsebyråd i Bergen, og 5. kandidat på Hordaland-lista.

KrF har eit forslag som i korte trekk går ut på at pårørande som tar seg av eldre over 75 år med dokumentert behov for omsorg, kan få 7500 kroner i månaden, som ei kontantstøtte.

Det kan bety at eldre kan bu heime lengre før det blir nødvendig med sjukeheimsplass. Det kan ha mykje å seia for samfunnsøkonomien.

– KrF er eit parti som held løftene sine. Me viser igjen etter relativt kort tid i regjering, påpeiker Husa.