nyhende
Strålande påskevêr i vente i Sør-Noreg
Eit høgtrykk er på full fart inn mot Sør-Noreg og treffer blink med påskehelga. Både folk som vel bypåske og dei som skal på hytta, har knallsol i vente.
– Vi har ei veldig fin helg i vente. Det er all grunn til å ta med seg både solkrem og solbriller, seier statsmeteorolog Martin Granerød ved Meteorologisk institutt til NTB.
Høgtrykket, som førebels er ute i Norskehavet, byggjer seg opp og vil prege vêret gjennom påskedagane, fortel Granerød.
– Det treffer jo blink akkurat for påskehøgtida, seier meteorologen, som seier det vil bli lange periodar med sol og flott påskevêr over store delar av Sør-Noreg.
Temperaturane vil liggje mellom 13–15 grader i låglandet. Det er venta rolege vindforhold både i fjella og i låglandet.
– Dei som har bypåske vil òg få nokre veldig fine påskedagar, seier Granerød.
Fine påskeforhold i fjellet
Heile helga vil blir prega av godt vêr, men det aller beste vil truleg komme fredag, seier meteorologen.
Høgtrykket vil aller først slå inn over Vestlandet. Samtidig vil lågtrykket bevege seg austover i løpet av torsdag, og det vil ta noko tid før vêret slår om for alvor.
Langs vestlandskysten kan påskedagane bli prega av noko tåke om morgonen, som vil lette opp utover dagen. Også på Vestlandet kan det bli opptil 15 grader, seier Granerød.
– Det vil vere periodar med litt skya vêr på Vestlandet. Det vil nok opplevast som ganske fint påskevêr, men det er vanskeleg å seie kor tjukt skydekket vil bli. Om det er tynt, vil sola skine rett gjennom, og ein merkar nesten ikkje at dei er der, seier han.
Også Midt-Noreg kan nyte godt av høgtrykket. Laurdag kan bli noko skya, men det vil bli rolege vindforhold.
– Det ligg an til godt vêr for toppturentusiastane med veldig fine påskeforhold i fjellet, seier meteorologen.
Grått i nord
Medan store delar av Sør-Noreg badar i påskesol, ser det litt meir grått ut i Nord-Noreg. Jo lenger nord ein kjem, jo mindre blir vêret påverka av høgtrykket.
– I Nordland vil det komme ein del vind inn frå havet, som dreg med seg eit skydekke som vil prege helga. Fredag vil det bli ein del tåke langs kysten, seier Granerød.
Temperaturane langs kysten vil i helga liggje på mellom 5–8 grader, det vil bli lite vind, og det kan komme ein og annan regnbye.
Det har gått ei rekkje snøskred både i nord og vest den siste tida. Snøskredfaren er framleis betydeleg fleire stader, og meteorologane ber skigåarar vere varsame.
I Troms og Finnmark kan det komme gløtt av sol fredag, men også her vil helga pregast av gråvêr.
– Det kan komme sludd og regnbyer i lågare strøk, medan det vil komme som snø i fjellet. På Finnmarksvidda og Aust-Finnmark slepp dei noko billigare unna, der kan det bli litt mindre nedbør, med tidvis sol.
Gode køyreforhold
Etter to år med pandemi, har det denne påska vorte registrert ein stor pågang på flyplassane, og mange vel å reise utanlands i år.
Det òg er venta stor påskeutfart på vegane dei neste dagane. For alle som skal leggje ut på vegen anten for å dra på hytta eller besøkje familie, så ligg det an til gode køyreforhold, fortel Granerød.
– No har vi hatt ein start på påska med mykje vind og uvêr og vanskelege køyreforhold fjellet. Siste halvdel av påska vil det vere gode køyreforhold, men det er greitt å sjekke vêr og føre før ein dreg, seier han.
Statens vegvesen har bede folk vere forsiktige på vegane i påska.
– Vi går for nullen i årets påsketrafikk. Statens vegvesen vil at du skal vere litt kylling i påsketrafikken, sa vegdirektør Ingrid Dahl Hovland i Vegvesenet før påska.
(©NPK)
