Stenger i Førde

Onsdag kom den dårlege nyheita for campingvogn-og bobilentusiastar, Aktiv Caravan skal stenga ned avdelinga på Førde.

Slutt etter april

Sidan april 2021 har dei heldt til på Hanaleite, og om nokre veker er det slutt.

— Drifta fortset som normalt ut april månad, seier selskapet på sin Facebook-side.

Dei ber alle kundar med behov om å retta førespurnadane sine til avdelinga i Bergen, og beklagar for ulempene det medfører.

Årsaka til stenginga er økonomisk, og i kunngjeringa beskriv dei marknaden som uroleg og utfordrande.
Marknadssjef Kine Midttun ved kontoret i Bergen utdjupar kvifor dei valde å stenga.

— Me vil legga alle ressursane me har på avdelinga på Kokstad i Bergen. Det er Aivon Baretto, dagleg leiar, som har teke avgjersla, og det var fordi me hadde rett og slett nok med å styra denne avdelinga, seier ho.

Ho fortel at det har vore ulike økonomiske faktorar som har påverka valet, mellom anna renta.

— Det er ein utfordrande marknad, og me har sett rentehevingar og slikt, seier Midttun.

Godt leia

Butikken på Førde har vore open i to år, og marknadssjefen er tydeleg på at den ikkje har vore noko pengesinke.

— Det tek alltid tid å opparbeida ein ny butikk, og me var på rette vegen, seier ho.

Midttun synest det er veldig trist at den no skal stenga. Ho understrekar at den har vore godt leia.

— Øystein Tveit har gjort ein fenomenal jobb og me har fått mange gode tilbakemeldingar om han, seier ho.

Fleire nytta mogelegheita til å takka for god service til dei tilsette, og å uttrykka misnøye over stenginga i kommentarfeltet til Aktiv Caravan Haugalandet.

Dei som jobbar der vil truleg verta oppsagd fortel dagleg leiar Aivon Baretto.

— I utgangspunktet seier me dei opp, eventuelt kunne dei fått tilbod om jobb i Bergen, men det vert litt for lang reiseveg. Dei har vel avstått frå det, seier han.

Som dagleg leiar merkar han sjølv korleis den noverande økonomien gjer det vanskeleg for selskapet.

— Det er marknadssituasjonen, det er tøffe tider med kjøpekraft og renta. Det merkar me også her. Eg skulle ynskje at me ikkje måtte gjera det, men me må ta grep, seier Baretto.