Startar bygging av ny trafostasjon denne veka

Har du gått forbi Vestvind-huset og opp mot Sveio senter, har du kanskje sett diverse oransje merker langs sykkel- og gangvegen og på plenen ved haugen framfor rådhuset. Det er også sett opp fire stikker og merka rundt desse.

Årsaka er at Haugaland Kraft skal bygga ny trafostasjon. Forarbeidet starta 5. februar med søk og merking av kablar i området. Den jobben var det to karar frå Løvvik Aero Telecom som gjorde. Selskapet hadde fått oppdraget av Fagne, som skal gjera jobben for Haugaland Kraft.

– Utgått på dato

Det blei sett opp stikker der trafoen var tenkt plassert. Etter kvart, mellom snødagane, har det blitt merka ytterlegare. Torsdag sist veke var to mann på befaring i haugen framfor rådhuset, og denne veka tek etter planen gravearbeidet til.

– Den gamle trafostasjonen er utgått på dato og skal fjernast. Den nye vil vera oppdatert til dagens standard og gi betre kapasitet, seier Fredrik Aalo Flood, einingsleiar drift og anlegg i Sveio kommune.

Endra plassering

Opprinneleg ønska Haugaland Kraft å plassera trafostasjonen på plenen der dei fire merkestikkene står. Det er det blitt endring på.

– Den plasseringa er for nært statuen, og trafostasjonen ville også blitt for dominerande i området. No skal den byggast lenger opp mot haugen og den gamle stasjonen, fortel Flood.

Kraftlaget har vore ivrige på å koma i gong, og har bede om å få starta i slutten av februar. Det har kommunen gitt løyve til.