Snart kjem det ny plan for Ekrene Vest

Etter at kommunestyret avslo å godkjenna planen og ba om fleire konkrete endringar 21. september 2020, har kommunen si eining for plan og næring arbeidd med å justera planen i samarbeid med konsulentselskapet Cowi AS. Endringane som er gjennomførte, er så omfattande at planen truleg må leggjast ut til offentleg høyring på nytt, seier Tollefsen. Han vil ikkje gå nærare i detalj om innhaldet enno.

Når områdeplanen for Ekrene Vest nå snart er klar for ein ny runde med politisk behandling, skjer det ti år etter at arbeidet med planen tok til. Planområdet ligg på vestsida av Fv. 47 på Ekrene, mellom den nåverande Rophusvegen og Fv. 541. Planen vil opna for bustadbygging i det bynære og mest attraktive utbyggingsområdet i heile Sveio.

Ny veg til Rophus

Eit vesentleg element i områdeplanen for Ekrene Vest er ny veg til Rophus. Vegen skal gå frå nytt kryss med Fv. 541 ved Torvhidleren og gjennom planområdet. Eitt av krava kommunestyret kom med for to år sidan, var at traséen for den ny Rophusvegen gjennom planområdet måtte leggjast om. Ny veg har i årevis vore eit krav frå dei som bur på Rophusfeltet, og ordførar Linn Therese Erve (Ap) seier det hastar med å få bygt denne vegen. 

Kommunen har så langt ikkje sett av pengar til ny Rophus-veg. Ordføraren vil heller ikkje røpa om det vil koma forslag om investeringsmidlar til vegen i det budsjettet som skal leggjast fram seinare i haust.

Når områdeplanen er klar må mesteparten av området detaljregulerast før utbygginga kan ta til. Planområdet som blei lagt fram for kommunestyret hausten 2020, var på 530 dekar. Eit anna krav frå kommunestyret var at området måtte reduserast, sidan ein del av grunneigarane ikkje er interesserte i å vera med på den utbygginga som planen opnar for.

Planen opnar for omfattande bustadbygging. Det er også sett av eit areal på rundt ti dekar til ny barnehage.

Forstår tidsbruken

Rune Teikari (Frp) formulerte det forslaget som heile kommunestyret slutta seg til for to år sidan. I vedtaket ber kommunestyret om å få planen tilbake til politisk behandling så snart som mogleg.

— Er to år så snart som mogleg?

— Det er sjølvsagt uheldig at det har gått så lang tid, men dette heng saman med at me har knapt med planleggingsressursar i kommunen, seier Teikari i dag.

Han har dermed forståing for tidsbruken. Nå ser han fram til å få den reviderte planen til behandling, og er spent på kva løysingar som blir presentert både med tanke på dei grunneigarane si ikkje er interesserte, og for vegtraséen til Rophus.