nyhende
Snart i mål med store vegprosjekt
To store vegprosjekt i Sveio blir fullførte tidleg på sommaren. Det gjeld trafikksikringstiltaka på strekninga Drange-Hanaleite på E39 og undergangen i Rophuskrysset på Fv. 47 på Ekrene.
– No er me heilt i innspurten, seier Knut Stian Rimmereid i Statens vegvesen.
Han er byggeleiar med ansvar for prosjektet Drange-Hanaleite. I desse dagar pågår det asfaltering på denne strekninga. Etterpå ventar oppsetting av rekkverk og fullføring av sideareal. Til slutt kjem merking og skilting.
Tidleg i juli
– Me skal vera ferdige i byrjinga av juli, seier Rimmereid.
Det blir inga offisiell markering av opninga frå Statens vegvesen si side.
– Markeringa blir at alle skilt som varslar anleggsarbeid blir fjerna og fartsgrensa blir sett opp igjen til 80 km/t, seier byggeleiaren. Han samanliknar dette med strekninga Solheimslio-Bårvåg, der det blei gjort tilsvarande arbeid for nokre år sidan.
Sveio-selskapet Birkeland AS er hovudentreprenør for prosjektet. Drange-Hanaleite er på 1.800 meter og omfattar gang- og sykkelveg på deler av strekninga. Anleggsarbeidet starta i september 2023. I mai i fjor fekk Vestavind opplyst at arbeidet skulle vera ferdig i mai i år. I forhold til dette er det ei lita forseinking når målstreken no er flytta til byrjinga av juli.
Rophus-krysset
Også arbeidet med Rophus-krysset på Fv. 47 nærmar seg fullføring.
– Me er i rute. Etter kontrakten med hovudentreprenøren Vassbakk & Stol AS skal me overta det ferdige krysset 11. juli. Det ser ut til å halda, seier byggeleiar i Vestland fylkeskommune med ansvar for prosjektet, Arvid Steinsland.
Enno står det igjen asfalteringsarbeid og fjerning av massar. Vegen blir opnar for trafikk så snart arbeidet er ferdig. Offisiell markering blir det også, men kanskje ikkje før etter ferien, fortel Steinsland.
Per 17. juni er bilvegen opna for køyring, men vegmerking og opning av undergangen står framleis att.
