nyhende
Skred og flaum stengde norske vegar over 400 gonger i fjor
Norske riks- og fylkesvegar vart stengde 402 gonger på grunn av skred eller flaum i fjor. NAF meiner rassikring må bli ei prioritert oppgåve.
Auka nedbør og meir ekstremvêr utset vegnettet for større påkjenningar enn før.
Tal NAF har henta inn frå Statens vegvesen viser at norske riks- og fylkesvegar i fjor vart stengde 402 gonger i fjor på grunn av skred eller flaum. Året før var talet 748.
Fylkesvegane mest utsette
– Med ekstremvêr og ekstreme vêrskifte, kan det skje uventa hendingar langs vegane som fører til stengingar eller i verste fall ulykker. Me meiner det må vera ei prioritert oppgåve å sikra vegane betre mot skred, ras og ekstremvêr, seier pressesjef i NAF Ingunn Handagard i ei pressemelding.
Det er fylkesvegane som er mest utsette for skred, ras og flaum, med 304 stengingar. Tala for europaveg og riksveg var høvesvis 74 og 24.
– Det får store konsekvensar når høgt trafikkerte riksvegar blir stengde i lengre tid, seier Handagard.
2.100 rasfarlege stader kartlagt
Det er om lag 255 skredfarlege stader på riksvegane med høg eller middels faregrad, og meir enn 450 utsette stader på fylkesvegane. Totalt er det kartlagt meir enn 2.100 rasfarlege stader langs vegane, med ulik faregrad.
2025 var prega av ei rekke naturfarehendingar over heile landet. Ei kronologisk oversikt over dei viktigste hendingane finn du her.
