nyhende
Skal granske helsa til 140.000 kvinner over 60 år
Det neste halve året får 140.000 kvinner over heile landet tilbod om å vere med i ei stor spørjeundersøking om helse.
«Kvinner og helse» er Noregs største undersøking om nettopp helsa til kvinner, og vart første gong gjennomført i 1991.
– I den nye undersøkinga skal vi undersøkje korleis levevanar og sosiale forhold i livet er knytt til sjukdomsrisiko, helse og helserelatert livskvalitet blant kvinner, seier førsteamanuensis og prosjektleiar Tonje Braaten ved Institutt for samfunnsmedisin ved Noregs arktiske universitet i ei pressemelding. Det er UiT Noregs arktiske universitet som står bak undersøkinga.
Sidan oppstarten har meir enn 172.000 norske kvinner delteke i undersøkinga, som opphavleg heitte «Kvinner og kreft» og som var ei undersøking om kreftsjukdom.
No blir kvinner i alderen 60 til 98 år inviterte til å svare på nye spørsmål om helse, trivsel og livsforhold, sjukdomshistorikk, søvn, minne, kosthald, livsstilsvanar og sosiale forhold gjennom livet. Dette er kvinner som har delteke i tidlegare undersøkingar av kvinnehelse.
Dei første deltakarane får undersøkinga i form av eit digitalt eller fysisk brev i byrjinga av juni. Deretter blir undersøkinga send ut i puljar gjennom sommaren og hausten 2025.
