Sju politikarar tar stilling til skulesaka i kveld

Saka blir ei av totalt 15 saker denne ettermiddagen/kvelden. Det er sett av tid til møtet frå kl. 17.00-21.00, men ein kan gjerne forventa seg at det tar lengre tid. Skulebruksplan for Sveio kommune 2012-2027 er sett opp som nest siste sak.

Nokre av kommunestyrerepresentantane har gitt uttrykk for sine meiningar, andre ikkje. Sveio FrP har fire representantar i kommunestyret, to av dei møter også i formannskapet.

Me tar kontakt med gruppeleiar for kommunestyregruppa, Rune Teikari for å høyra korleis dei har jobba, kva dei tenker om saka så langt – og kva dei vil stemma for.

Feil å forskottera

– Me har brukt tida sidan saka kom ut, og fram til formannskapsmøtet til å setja oss inn i saka. Å forskottera kva ein skal stemma før eit møte blir feil. Det kan komma nye moment i saka, eller framlegg til vedtak som må vurderast der og då, seier Teikari.

For eigen del kjem han til å støtta innstillinga frå hovudutval oppvekst og kultur, eller eit tilsvarande framlegg i formannskapet, om det ikkje kjem heilt nye moment. Det vil seia at Teikari i utgangspunktet støttar rådmannen sitt framlegg til vedtak om å leggja ned to skular i år.

– På same tid er saka viktig, og me vil halda fram med prosessen i kommunestyregruppa fram mot kommunestyremøtet, seier Teikari.

Ruth G. Østebøvik Eriksen frå same parti, ønskjer ikkje å uttala seg før møtet.

Desse møter fast i formannskapet

• Linn Therese Erve (Ap)
• Ruth G. Østebøvik Eriksen (FrP)
• Rune Teikari (FrP)
• Håkon J. Skimmeland (Ap)
• Monica V. Valen (Sp)
• Lars Einar Hollund (H)
• Jarle Jacobsen (KrF)