nyhende
11.127 Sveio-dosar:
Siste stikk på soknehuset
Etter å ha sette meir enn 11.000 stikk med koronavaksine, var det torsdag ettermiddag slutt på den ordinære vaksineringa i Sveio soknehus.
Sveio soknehus har vore staden for å vå vaksine mot covid-19. No har dei aller fleste tatt dei anbefalte vaksinedosene, og kommunen gjennomførte siste ordinære vaksineringsdag i soknehuset torsdag sist veke.
Meir enn 11.000 stikk
Det er totalt sett 11.127 vaksinedosar i Sveio.
— Soknehuset har vore særs godt eigna med gode fasilitetar og ei utforming som har gjort det enkelt i høve til smittevernrutinar, seier kommunalsjef helse og omsorg Ingunn Toft.
Ho trekk fram at soknehuset mellom anna har mange dører, noko som har gitt god flyt.
På det meste har omlag 500 ibuarar blitt vaksinerte på ein dag.
— Vaksinasjonen har i størst grad vore gjennomført av tilsette ved helse og omsorg, med det har i periodar og vore nytta anna personell, opplyser Toft.
Ros til medarbeidarar
Ho rosar innsatsen dei tilsette har lagt ned.
— Det har vore kjekke dager med flotte og fleksible medarbeidarar som har bidrege til ei veldig god gjennomføring, seier ho.
No held resterande vaksinasjon fram på helsestasjonen og ved Apotek 1 på Sveio senter.
