nyhende
Sikra seg VM-plass i tre kategoriar
Tre juniortroppar frå Sveio Drill vann sine kategoriar under Vinterpokalen i helga. Dei er dermed sikra VM-plass i Liverpool.
Gullmedaljane blei henta i kategoriane Showtwirl, Exibition og Batonflag. Det var eit flott knippe sveibuar og haugesundarar som kunne jubla for både siger og kvalifisering til VM i august. Troppen som vann uttaket i Showtwirl er nemleg ein samarbeidstropp mellom Sveio og Haugesund.
Troppane er i alderen 14 til 19 år. Dei konkurrerte også individuelt i ein heil del kategoriar.
Drill er blitt veldig populært, og Vigdartun har ikkje lenger nok plass til den populære konkurransen Vinterpokalen. Siste konkurranse i Vigadartun var i fjor. Sveio Drill har leigd Tysvær Arena dei to gongar dei siste tre åra. Men det er først i år dei har kunna ta den store arenaen i full bruk utan koronarestriksjonar.
Rekordpåmelding
— I helga var det rekordpåmelding med 360 deltakarar fordelt på 24 forskjellige troppar frå Rogaland og Hordaland. Det blei konkurrert i 80 kategoriar, og det var 410 ulike startnummer å halda styr på, fortel Inger-Emilie Kvalvåg Panayiotou, leiar i Sveio Drill.
Det var også mange og såg på, og rundt 1.000 var innom hallen i løpet av helga.
Vinterpokalen er eit samarbeid med NMF (Norges Musikkorps Forbund) Rogaland og Hordaland. Å vera teknisk arrangør for eit så stort arrangement, krev mykje innsats også frå dei som ikkje konkurrerer.
Takkar foreldra
— Eg vil gje ein stor takk til foreldra som stiller opp. Utan dei hadde det ikkje vore mogeleg å gjennomføra arrangementet. Dei står på tidleg og seint og gjer ein fantastisk jobb. Me er også takksame for at me fekk låna Frakkagjerd ungdomsskule til overnatting, seier Kvalvåg Panayiotou.
