— Ser fram til å byrja

Ho bur i Haugesund og kjem til å pendla til Sveio. Oftast går det andre vegen, men for Torunn Bjelland vert det uansett ikkje så langt.

— Eg bur på Kvala, seier Bjelland.

Ho er den nye konsulenten på kommunen sitt servicekontor. Med seg til sin komande jobb har ho over to tiår med erfaring.

— Eg har jobba i 20 år på Blå Kors klinikk for Haugalandet. Det har vore interessant og lærerikt, seier Bjelland.

Familie på Bjelland

— Korleis fekk du den jobben?

— Eg søkte stilling der i 2003. Då var eg først på poliklinikk som sekretær, og sidan har eg vore dei fleste åra i administrasjonen, seier ho.

Hennar rolle som administrasjonssekretær gav ho mogelegheit til å jobba på tvers av avdelingar. No ser ho fram til å jobba i Sveio.

— Det verkar veldig spanande, med mykje variasjon i arbeidsoppgåver, seier Bjelland.

— Har du noko relasjon til Sveio frå før?

— Ja, eg har familie på Bjelland, svarar ho.

Nye utfordringar

— Kvifor søkte du denne jobben?

— Eg ynskja meg nye utfordringar. Så eg gler meg til å starta i ny jobb og tenkjer det vil gje meg nye erfaringar, seier Bjelland.

Ho beskriv søknadsprosessen som veldig kjekk og gjev ros til korleis det gjekk for seg.

— Eg fekk eit veldig godt inntrykk av servicekontoret. Eg har vore å helsa på dei, seier ho.

Bjelland er 53 år og byrjar i starten av august.