Bli abonnent
Logg inn

nyhende

Sveio formannskap under debatten om fylkestilhøyrsle onsdag kveld.SKJERMDUMP: SVEIO KOMMUNETV
Sveio formannskap under debatten om fylkestilhøyrsle onsdag kveld.SKJERMDUMP: SVEIO KOMMUNETV

Samrøysta om Vestland

Sveio formannskap gjekk onsdag inn for at kommunen framleis skal vere i Vestland fylke. Det er i tråd med resultatet av folkerøystinga sist veke. Politikarane nytta høvet til å stille klare krav til Vestland.

Publisert Sist oppdatert

Formannskapet sitt vedtak

Samrøysta vedtatt av Ap, KrF, H, KrF og Sp:

1. Kommunestyret syner til resultatet av den rådgjevande folkerøystinga 10. januar 2022 der eit fleirtal har røysta for å bli verande i Vestland fylke, og finn det ikkje aktuelt å gå vidare med sak om byte av fylkestilhøyrsle.

2. Kommunestyret ber rådmannen avklare prosess om forskriftsfesta skuletilbud i Rogaland med Vestland fylke snarast. Dette skal også inkludere oppfølgingstenesta.3

3. Kommunestyret ber rådmannen snarast styrka dialogen med Vestland fylke, med ei hensikt om at våre ibuarar skal ha kun ei takstsone ved kollektivtransport til og frå Haugesund. I arbeidet kan ein gjerne trekke inn andre Sunnhordalandskommuner for å gjere tilbudet breiare.

4.Kommunestyret ber rådmannen snarast styrka dialogen med Vestland fylke, med formål at Vestland fylke skal prioritere opp våre fylkesvegar i sine planar. Dette gjeld særleg FV47 frå Haukås til Sveio sentrum som manglar veglys, og strekninga frå Tveit til Ekrene, som har høg trafikk, og FV541 Tjernagelvegen, då spesielt strekninga Krossleite – Grimstveit.

5. I følge Intensjonsavtalen mellom Hordaland og Sogn og Fjordande skulle det i dag vere eit vegkontor og ei næringsavdeling i søre del av fylket. Sveio ser at konsekvensane av mangel på dette, er med å nedprioritere Sveio og Sunnhordland. Kommunestyret ber derfor rådmannen sammen med Samarbeidsrådet for Sunnhordland, vere med å sette fokus på innhaldet i intensjonsavtalen med mål om å få dette på plass.

6. Kommunestyret skal vere løpande orientert om prosessen opp mot Vestland fylke.

Saka skal handsamast av kommunestyret i Sveio førstkomande måndag.

Spørsmålet om eit eventuelt fylkesbyte vart handsama første gong etter folkerøystinga av formannskapet onsdag kveld.

Det vart som venta ingen diskusjon om kva vei partia ønskjer at kommunen skal gå. Alle vil lytte til resultatet av folkerøystinga, som viste 56 prosent ville bli verande i Vestland.

— Ryddig

Rune Teikari (Frp) gav uttrykk for at det er rett å respektere resultatet av folkerøystinga i ei sak som ikkje har vore nemnd i noko valprorgram eller på anna vis vore signalisert vile kome opp i kommunestyreperioden.

— Difor er det ryddig, sa han.

Han trakk samtidig fram at prosessen har fått i gang nyttige debattar. Mellom anna om fylket sitt samferdsle-selskap, Skyss, sine takstsoner. Og om ein mogeleg forskriftsfesting av Sveio-ungdomen sin rett til å søke vidaregåande utdanning i Haugesund.

— No er det viktig å nytte denne prosessen til å jobbe vidare med desse sakene, slik at dei ikkje blir ein del av ein gløymd debatt, sa han.

Hans partifelle, varaordførar Ruth Eriksen, la til at ho vil ha med seg alle sunnhordlandskommunane i eit arbeide for å styrke regionen sin posisjon i det nye Vestland fylke.

— Sveio og Sunnhordland lir under mangelen på ein administrativ ressurs i fylkt, som kan jobbe med saker for oss i sør inn mot fylket, sa ho.

Ho viste til at Sogn og Fjordane har ein slik ressurs, og at det har vore nyttig for den regionen, mellom anna i arbeid med takstsonene til Skyss.

Sveio først

Lars Einar Hollund (H) la vekt på at det er viktigast å ha mest mogeleg tankar om Sveio i tida som kjem.

— Me må gjerne ta med oss Sunnhordland. Men fylkesleiinga har følgd Sveio sin prosess kring saka om fylkestilhøyrsle nøye, og no er det viktig for fylket å bry seg om Sveio. Og no er det opp til oss å stille krav, sa han.

Også Hollund trekte fram Skyss sine takstsonene som ei viktig sak.

— At me skal betale 60 kroner for å ta buss til vårt regionsenter, mens dei andre slepp unna med 40 kroner, er ikkje bra, sa han.

Jarle Jacobsen (KrF) la til at når alt kjem til alt handlar det om politisk innflytelse.

— Eg trur me må gå i oss sjølve, og gjere ein jobb for å heie på sunnhordlandskandidatar når vi kjem til nominasjonsprosessen neste år. No er vi ekstremt underrepresentert, sa han og viste til at blant dei 67 fylkestingspolitikarane, så er det berre fire frå Sunnhordland.

Glad for at 16-åringane fekk røyste

Håkon Skimmeland (Ap) nytta debatten til å gi ros til kommunestyret som let alle ungdommar fødde i 2005 eller tidlegare delta i folkerøystinga.

— Utan at eg har nokre tal, så veit eg at blant ungdomane eg har hatt ein prat med, så har det vore eit visst engasjement. Det synes eg er kjempebra. Det er tross alt dei som skal vere førstegongsveljarar ved neste lokalval, sa han.

Jarle Jacobsen (KrF) var ikkje heilt overbevist om at det var så stort engasjement blant dei unge. Han viste til at når han sto på stand snakka med innbyggaranen om saka, var det fleire vaksne som ikkje eingong forstod heilt kva eit fylkesbyte handla om.

— Nokre trudde det handle om sjukehus, dei hadde ikkje eingong fått med sjukehusreforma, sa han.

Etter debatten fremja Rune Teikari (Frp) fellesforslag om å ikkje gå vidare med sak om byte fylkestilhøyrsle, som vart samrøysta vedtatt i formannskapet av Ap, Frp, Sp, H og KrF.
nyhende fylkestilhøyrsle
Powered by Labrador CMS