– Regjeringa nedprioriterer regionen vår

Ordføraren, som også er leiar i Sunnhordlandsrådet, reagerer derimot kraftig på at Haugaland- og Sunnhordland-regionen blir nedprioritert i samband med desentraliseringa av legestudiet.

Førde før Haugesund

Opplegget, kalla Vestlandslegen, går ut på at medisinstudentane tar dei første tre åra av utdanninga ved Universitetet i Bergen. Deretter får dei fullføra ein annan stad på Vestlandet. Opplegget er allereie i gang i Stavanger, og  Helse Fonna har budd seg på å ta imot dei første studentane i Haugesund i 2029. No vil regjeringa først utvida tilbodet til Førde i Sunnfjord og har sett av pengar til 20 studieplassar der.

– Det er no andre gong på kort tid at vår region blir nedprioritert av regjeringa i viktige nasjonale til delingssaker. Nyleg blei det kjent at regjeringa legg nasjonalt senter for yrkesfag til Molde. No blir det arbeidd breitt politisk for å få Helse Fonna og vår region på kartet igjen slik at me kan få dei første legestudentane i 2029, seier Haukås.

Ekstraløyving i desember?

For Sveio sin del er ordføraren spent på kva som vil koma ut av budsjettsalderinga i desember. Etter det såkalla krisemøtet mellom kommunal- og distriktsminister Erling Sande (Sp) og KS fredag, har statsråden uttrykt forståing for kommunane sin situasjon og antyda at det kan koma ekstra overføringar i samband med budsjettsalderinga.

– Då kan det henda me får tilført ein del midlar som me ikkje har rekna med. På den andre sida, dersom skatteinngangen blir så låg som KS seier, er det godt mogleg at dette gjer utslag på våre skatteanslag. Då kan det visa seg at ei ekstraløyving berre vil vera ein kompensasjon for tapte skatteinntekter, seier ordføraren.

Haukås har tidlegare kommentert budsjettlekkasjen om at regjeringa vil ettergje studiegjeld for folk som utkantkommunar, nærare definert som kommunar i distritktsklasse 5 og 6. Dette gjeld for eksempel Bømlo og Vindafjord, men ikkje Sveio som er i klasse 4.

Har klaga

– Dette er svært uheldig, noko me har gitt uttrykk for overfor fleire representantar for regjeringa og andre parti på Stortinget. No viser det seg jo at refusjon av studiegjeld ikkje er med i statsbudsjettet for 2025, då regjeringa ikkje ser for seg å betala ut pengar gjennom denne ordninga før i 2026. Dermed har me enno tid til å påverka, seier Haukås

Han merkar seg at regjeringa i sin distriktspolitikk er oppteken av å gi fleire fordelar til kommunane i distriktsklassane 5 og 6.  Kommunane rundt som kjem inn i denne kategorien får for eksempel lågare makspris i barnehage enn kva Sveio får.

– Det betyr berre at me må jobba endå hardare for å vera ein god kommune å busetja seg i, konkluderer ordføraren.