Redd for steinsprang på Tjernagel

Sist i oktober fortalde Vestavind om frykt for steinras ved Gullvegen på Mølstre. Etter dette har Thorsen kontakta oss og fortalt om liknande frykt på Tjernagel.

Det er Øklandsvegen på strekninga mellom innkøyringa til ridesenteret og eit par hundre meter vestover han rettar søkelyset mot.

Avdekka av kantklippemaskin

Her er fleire bratte skråingar med mykje oppdelt fjell. Store og små steinar losnar stadig og blir liggjande i veggrøfta. Tilsynelatande kan også større blokker vera i ferd med å skli ut. Dette blei særleg tydeleg etter at kantklippemaskinen hadde vore i arbeid langs vegen på seinsommaren.

– Eg trur denne store maskinen var med på å riva laus steinar også. Det raste også ut steinar medan kantklippinga pågjekk. Her burde det vore reinska opp med gravemaskin, seier Thorsen.

Han har kontakta Statens vegvesen, som sende e-posten hans vidare til Vestland fylkeskommune sidan Øklandsvegen er fylkesveg. Thorsen påpeikar både i e-posten til styresmaktene og overfor Vestavind at den aktuelle strekninga på Tjernagel ligg i ei 50-sone som er utan veglys og har dårleg sikt.

– Her blir det dessutan ofte køyrd mykje fortare enn fartsgrensa, seier han, men legg til at dette problemet er størst om sommaren.

Geolog kontakta

I eit svar frå Vestland fylkeskommune skriv Morten Stokken mellom anna dette:

– Denne saka er registrert i vårt system, og det er bestilt geolog for vurdering.

Stokken legg til at ansvaret for opprydding etter skred er driftsentreprenøren sitt ansvar. Stokken er byggeleiar i Drift SØR Avdeling for infrastruktur veg i Vestland fylkeskommune.

På telefon seier Stokken til Vestavind at han ikkje veit når geologen får sjanse til å ta turen til Sveio og sjå på dei forholda som Thorsen har gjort merksam på.

– Geologane er svært opptekne, så eg kan ikkje seia noko meir om når det kan skje. Frå vår side er det ikkje aktuelt å setja i verk tiltak før det ligg føre ein geologisk rappport, seier Stokken.