Prishopp på ei rekkje polvarer

I snitt har prisane stige med 0,76 prosent sidan førre justering 1. mai, opplyser Vinmonopolet.

– Det er grossistane som set prisane. Nokre prisar går opp, medan andre går ned. Det kjem ny salspris på 7.924 av i alt 29.018 produkt, så fleirtalet av produkta beheld same pris, siger seniorrådgivar Hege-Lill Hagen Asp i Vinmonopolet til NTB.

På førehand hadde Vinmonopolet rekna med at prisauken i snitt skulle vere på under 1 prosent – og det er den jo.

Dei siste 12 månadene har det generelle prisnivået i Noreg stige med 6,8 prosent, når ein ser på konsumprisindeksen. Berre frå juni til juli steig prisnivået med 1,3 prosent, ifølgje SSB. Dermed har produkta på polet ein lågare auke.

Variasjon

Enkelte varer gjer eit kraftig prisbyks, men for dei fleste varene er det liten eller inga endring.

Blant nokre av dei kjende varemerka som aukar i pris, finn ein til dømes 350-centiliterflasker med Baileys og Aperol. Her aukar prisen med 11 prosent sidan sist. Auken er frå 134,90 kroner til 149,90 kroner for begge produkta.

Heilt øvst på lista over dei største prishoppa finn ein nokre dyre raud- og kvitvinar, men også enkelte vinar i lågare prisklassar aukar med opp mot 50 prosent i pris.

– Forventa

Generalsekretær Ingunn Jordheim i Foreininga til vin- og brennevinsleverandørane (VBF) seier at dei hadde venta ein viss auke i prisane.

– Det er som i andre bransjar. Alt har vorte dyrare. Alle innsatsvarer, som glas, papp, korkar, og ikkje minst logistikk og transport. Den evinnelege straumproblematikken påverkar også oss. I tillegg må ein planleggje med ein lengre horisont, for det er stor etterspurnad etter og mangel på mange varer.

Ho påpeikar likevel at valutakursen er nokså gunstig for tida, noko som kan motverke noko av prisauken.

– Ein del produsentar er nok også ganske forsiktige med å setje opp prisane, for konkurransen er beinhard, ikkje minst no som grensehandelen har teke seg opp igjen, seier generalsekretær Ingunn Jordheim til NTB.

(©NPK)