Politiet åtvarar mot oppsøkande handverkarar

– Me er kjent med at det har kome fleire aktører i området igjen som driv med oppsøkande handverkartenester. Dei skal vera påtrengande, og forsøker blant anna å få fatt sensitive opplysningar ved å tilby hjelp til utføring av betaling med bank-ID. Me meiner det kan vera potensiale for fleire typar bedrageri her, og ber alle vera merksame på dette, seier Kristina Valberg Håland, senterleiar for a-krimsenteret i Stavanger.

– Dersom det blir ubehageleg, ring politiet

Ho oppfordrar til å ikkje kjøpa handverkartenester av personar som oppsøker deg på døra. Oppsøkande handverkarar kartlegg aktuelle område, og dei kan velja ut bustadar med eldre og sårbare personar som dei kan knyta seg til.

– Dersom det blir ubehagelig, ring politiet, seier Valberg Håland.

Hun peikar også på at det er viktig å melda inn tips.

– Observerer du oppsøkande handverkarar i ditt nabolag, tips a-krimsenteret om dette så raskt som mogeleg. Tips kan du senda til akrim.rogaland@politiet.no, seier Valberg Håland.

Aktørane har gjerne ein allsidig portefølje, og kan tilby alt frå utvendig husvask til renovering, fasadearbeid og teppesal. Gjerne mot forskotsbetaling. Dei kan kan virka både sympatiske og tillitvekkande, men det er viktig å vera klar over at dette sannsynlegvis er useriøse aktørar som ikkje har nødvendig fagkunnskap, og som bevisst unndrar skatt og avgift, samt utnyttar arbeidstakarar, skriv Sør-Vest politidistrikt i ei pressemelding.

Dette bør du gjera før du vel handverkar:

• Sjekk om verksemda er registrert i Brønnøysundregistrene og Merverdiavgiftsregisteret.
• Få eit skriftleg tilbod på arbeidet som skal utførast, og avtal pris på førehand. Då står du sterkare i reklamasjons- og klagesaker.
• Be om og sjekk gjerne referansar frå andre som har brukt verksemda.
• Be om faktura slik at du har ei stadfesting på kva du betalar for.
• Betal via bank. Når du betaler for tenester via bank, blir det vanskelegare å unndra skattar og avgifter.