nyhende
Planprogram klart for ny E39
Planprogrammet for ny E39 mellom Bokn og Bømlafjordtunnelen er no vedteke av alle dei tre kommunane Bokn, Tysvær og Sveio, melder Statens vegvesen i ei pressemelding.
– Dette er ein viktig milepæl i arbeidet med planlegginga av ny og sikrare E39, heiter det vidare i pressemeldinga.
Planprogrammet set rammene for det vidare arbeidet med kommunedelplanane for den 67 kilometer lange strekninga med ny europaveg. Det blir planlagt to alternative korridorar for vegen.
Konsekvensutgreiing
– I prosjektet held arbeidet fram med optimalisering og konsekvensutgreiing av dei to vegkorridorane me har som alternativ. Me har fått mange gode innspel og merknader så langt, både på folkemøte og digitalt, og eg håper folk held fram å engasjera seg. Ein får betre planar og resultat når fleire er involverte, seier planleggingsleiar Henry Damman.
Det kan bli aktuelt å kombinera dei to korridoralternativa. Det kan også bli aktuelt å utvida planområdet, noko som i så fall vil bli varsla etter reglane i plan- og bygningslova, fortel Damman vidare.
Kommunedelplan i 2026
Kommunedelplanen vil tidlegast bli lagt fram for politisk behandling i dei tre kommunane i 2026. Først når kommunedelplanen er vedteken kan Statens vegvesen gå i gang med reguleringsarbeidet.
