nyhende
Perlesnormanet har skada oppdrettsfisk fleire stadar
Havforskingsinstituttet har måtta avlive eigen fisk grunna dyrevelferda etter manet-åtak på sjøanlegget sitt i Austevoll.
Det skriv instituttet sjølve i ein artikkel på nettsidene sine.
Den siste tida er det meldt om auka førekomst av perlesnormanet langs norskekysten, særleg på Vestlandet.
Det er også kome meldingar om at oppdrettsfisk har blitt skada og som følgje av det blitt avliva.
Det har skjedd mellom anna på Havforskingsinstituttet (HI) sitt eige anlegg i Austevoll kommune.
– Av omsyn til velferda til fisken har vi tatt avgjerda om å avlive den mest svekka fisken, for å unngå at denne lir, seier forskingsleiar Lars Helge Stien.
Perlesnormaneta er ein koloni sett saman av mange mindre individ. Nokre av desse individa har sterk neslegift for å beskytte kolonien og skaffe mat. Maneta kan verte opptil 30 meter lang, men vert delt opp i mindre bitar av både bølgjer, turbulens og fysiske barrierar – som merdar.
