Påverka sjåfør stengde Bømlafjordtunnelen

Det vart eit umiddelbart beslag av førarkort då politiet fekk stansa ein vinglande bil måndag kveld.

Ein sjåfør var på veg sørover mot Sveio gjennom Bømlafjordtunnelen og køyrde i påverka tilstand. Fleire gonger skal bilen ha skrapa borti autovernet langs sidene i tunnelen, og svinga over i motgåande køyrefelt.

Difor valde politiet å stenga tunnelen i ein kort periode.

– Det var ei kvinne heimehøyrande på Stord. Ho var påverka av narkotika, seier Håkon Tornes, vaktsjef ved Haugesund politistasjon.

Kvinna vart teken til legevakta for blodprøvar. Bilen vart henta av bergingsbil, og sak er oppretta.