nyhende
Pågang hos dekkskiftarane denne veka
Torsdag melde Kong Vinter sin ankomst og mange fann det klokast i å skifta dekk, først som sist.
– Vinteren kom eigentleg ikkje så veldig overraskande, dette var jo heilt etter vêrmeldinga, nikkar Øystein Bjelland. Me treff han på Haukås, klar til å køyra ut frå Haukås Dekk og Fritid AS, der han har fått skifta dekk.
Som distriktssjef for Volvo maskin, er Bjelland avhengig av bilen når han fartar rundt i heile Rogaland og Sunnhordland. Jobben hans består i å serva entreprenørar med anleggsmaskinar – både nytt og brukt.
– Det blir mykje køyring, rundt 35 000 – 40 000 kilometer i året, konstaterer Bjelland som er svært bevisst på å få skikkelege dekk på bilen. Han køyrer piggfritt, såkalla vinterdekk.
– Det er som regel dei anbefalingane Thor (Kinn jour. anm.) kjem med, og det har vore suksess for min del, fastslår Bjelland.
Stor pågang heile veka
Inne i verkstaden har haugen med brukte og nye dekk byrja å veksa.
– Det har vore travelt heile veka, folk ringjer og vil ha dekkskift, det er tida for det no, fastslår Thor Kinn. Han har ein god mann med seg på laget.
– Eg har vel skifta nokre tusen dekk i løpet av dei tolv-tretten åra eg har jobba her på Haukås, trur Håkon Hansen Ureta og vrengjer kjapt av eit dekk på ein felg. Snart er han i gong med hjul nummer to.
