Over halvparten framleis ledige eitt år etter

Tal for Sveio dei siste månadane, er 74 heilt arbeidsledige i januar, dei påfølgjande månadane er tala 62 for februar, og 97 for mars.

– Då koronapandemien traff oss vart brått rekordmange arbeidsledige. Mange kom raskt attende i jobb, men fleire er framleis ledige. Det uroar oss å sjå tal som viser at over halvparten av dei som er registrert som arbeidssøkjarar i dag, var ledig før pandemien eller i bølgja som kom, seier Anlaug Rygg Svensen, fungerande leiar i NAV region Sunnhordland.

Om lag 62 prosent av alle registrerte arbeidssøkjarar i Sunnhordland denne månaden, var ledige før koronapandemien eller vart ledig i mars og april i fjor.

– Det viser at langtidsledigheta bit seg fast. Frykta vår er at fleire skal falle heilt utanfor, og det må me hindre at skjer. Me må få flest mogleg inkludert i arbeidslivet. Samstundes må fleire tenke alternativt og auke kompetansen sin, slik at ein stiller sterkare på arbeidsmarknaden, seier  Svensen.

Arbeidsløysa har flata ut

I mars var arbeidsløysa i Sunnhordland til saman 2,7 prosent av arbeidsstyrken. Det er ein auke på 28 i høve februar månad.

– Arbeidsløysa har flata ut ved starten av året. Det er ein auke blant dei heilt ledige, men til saman er det ein liten nedgang i tal registrerte arbeidssøkjarar i høve førre månad, seier fungerande leiar i NAV region Sunnhordland.
Korleis arbeidsløysa utviklar seg framover vil vera usikkert og avhengig av smittevernstiltak og smittetrenden.

– Over halvparten av dei som registrerte seg i mars var permittert. Smitteutbrot og koronatiltak pregar arbeidsmarknaden. Denne månaden ser me ein særleg auke blant ledige som kjem frå næringar som service, butikk, reiseliv og transport, seier Anlaug Rygg Svensen.