nyhende
Ordføraren heidra europameistrane
Dei nybaka europameistrane til Sveio Drill fekk overraskingsbesøk av ordføraren på treninga onsdag kveld.
Det var sist sundag at Sveio Drill representerte Noreg under Europameisterskapen i drill i Italia, og gjekk heilt til topps i klassen exhibition junior.
Drilltroppen kom heim til Sveio seint tysdag kveld, og var på plass på trening allereie dagen etter.
Dit kom også ordførar Linn Therese Erve. Ho helste på og alle utøvarane fekk ein liten blomehelsing frå ordføraren.
— Sveio drill gjer ein enormt god jobb. Det er veldig imponerande å følgje dei, seier ho til Vestavind.
Annonse
Ho er ikkje i tvil om at prestasjonen deira blir lagt merke til, og at dei set Sveio på kartet.
— Dei er gode Sveio-ambassadørar, seier ein stolt ordførar.
