Bli abonnent
Logg inn

nyhende

FHI ber om at foreldre og føresette i dei tusen heimar går gjennom husstanden med lusekammen. Her er ei vaksen hovudlus avbilda. FOTO: PREBEN OTTESEN / FOLKEHELSEINSTITUTTET/ NTB / NPK
FHI ber om at foreldre og føresette i dei tusen heimar går gjennom husstanden med lusekammen. Her er ei vaksen hovudlus avbilda.

Oppmodar alle foreldre til å sjekka for hovudlus

Hovudlus er eit tilbakevendande problem. Helga 11.–12. mars ber FHI om at alle foreldre og føresette sjekkar husstanden for hovudlus

Publisert Sist oppdatert

Slik sjekkar du

  • Lusesjekk kan gjerast både i fuktig og tørt hår, men FHI anbefaler å fukta håret og gjerne tilsetta hårbalsam.
  • Bruk ein fintanna lusekam. Kan kjøpast på apotek. Etter bruk må lusekammen frysast i -20 ºC i minst 4 timar eller vaskast ved 60 ºC før andre kan bruka den.

Lusesjekk i vått hår:

  • Legg eit kvitt handklede over skuldrene når du kjemmer, og sjekk både handkledet og lusekammen for lus. Lusene er små, og eit forstørringsglas kan vera nyttig å bruka.
  • Tørk kammen regelmessig av på eit kjøkkenpapir for å sjå etter lus mens du kjemmer. Eventuelle lus vil tørka på papiret i løpet av eit par minutt, og du kan då sjå at dei beveger seg.

Lusesjekk i tørt hår

  • Nokre føretrekk å gjera lusesjekken i tørt hår. I tørt hår beveger lusene seg, og dei kan derfor vera lettare å få auge på. Samtidig bør du vera obs på at håret og kammen kan bli statisk elektriske når du greier i tørt hår, og små lus kan fyka frå kammen og tilbake i håret.
  • Den som blir greidd, kan stå bøyd over eit stort kvitt ark, og du greier frå hovudbotnen og ned mot arket.

Kjelde: FHI

— Viss alle sjekkar seg denne helga slik at dei med lus kan behandlast på omtrent same tidspunkt, vil det redusera talet på hovudlustilfelle, seier forskar Bjørn Arne Rukke i avdeling for skadedyrkontroll ved Folkehelseinstituttet (FHI) i ei pressemelding.

Anslagsvis blir 1–2 prosent av alle barneskulebarn ramma av lus. Det gjeld heile tida. FHI beskriv lusa som eit tilbakevendande problem i både skular og barnehagar.

Ikkje så mange dei siste åra

– Det er kvart år nokre som får luseplager, men det har ikkje vore så mange dei siste åra, seier Grethe Natås, leiande helsesjukepleiar i Sveio kommune.

Den nasjonale kampanjen blir følgt godt opp kvart år med informasjon til skular og barnehagar. Kommunen har også informasjon på heimesida. Natås har ei oppfordring til dei som får lus:

– Av og til kan det vera vanskeleg å bli kvitt lusa. Det er derfor veldig viktig å behandla slik preparata ein får kjøpt på apoteket viser, samt bruka lusekam.

Bør behandlast raskt

For å sjekka om ein er smitta, tilrår FHI at ein til dømes greier håret med lusekam, greier det heile vegen frå hovudbotnen til hårspissane og greier håret medan det er vått.

– Barn med hovudlus treng ikkje å haldast heime frå barnehage og skule, men ein bør prøva å få behandla dei så raskt som mogleg, skriv FHI.

Lurer du på korleis du kan bli smitta? Kva symptom du skal sjå etter? Korleis behandla? Kor lenge lusa lever? Om heile huset må vaskast ned etter smitte? Svar på dette og mykje meir finn du på FHI si temaside Hovudlus.
nyhende
Powered by Labrador CMS