Opninga av vegen let venta på seg

Strekninga frå krysset inn til Sveio omsorgssenter og opp til Tjernagelvegen blei stengd før påske etter at det blei oppdaga sprekkar i asfalten. Bekken nedanfor hadde tæra på grunnen vegen står på. Det førte til at delar av autovernet og vegskuldra byrja å sige ut.

– Vegen blir nok stengd i nokre månader, men det er veldig usikkert, seier Andreas Ekreheim, prosjekt- og byggeleiar i Sveio kommune.

Sveio kommune har engasjert Birkeland AS til å utføra gravearbeidet, og geoteknikarar er òg kopla på for å vurdera grunnforholda og kva tiltak som må til for å sikra vegen.

Betre enn frykta

Richard Årteig, maskinførar i Birkeland AS, har sidan stenginga arbeidd med å grava ned til fjell.

– Me må komma oss ned på fast fjell før me kan byggja opp vegen igjen. Me frykta at det var jord ganske langt ned, men førebels ser det ut til å vera meir fjell enn me trudde, seier han.

– Samstundes har infrastruktur rundt vegen gjort at arbeidet har blitt meir omfattande enn det ideelt sett ville vore, legg Ekreheim til.

Prosjekt- og byggeleiarar understrekar òg at det framleis er stor uvisse knytt til både framdrift og kostnader.

– Generelt tek slike byggeprosjekt lengre tid enn forventa og kostar meir enn ein antek. Her veit me framleis ikkje heilt kva som ventar oss medan gravinga pågår, seier han.