Opna gapahuk med sag på kvednadagen

Ordførar André Mundal Haukås sto for sjølve opningsseremonien. Denne gongen skjedde det ikkje med snorklipping, men ved at ordføraren sagde over ei fjøl som sperra inngangen til gapahuken, fortel Egil Lokna.

Lokna har stått i spissen for arbeidet med gapahuken saman med Olaf Lokna, Nils Lokna og Svein Vold. Nokre yngre dugnadsfolk har dei også hatt med seg, særleg i samband med taktekkinga.

– Me er for gamle til å klatra på taket, ler Egil og Olaf, som me møter på byggeplassen torsdag.

25 kvadratmeter

Gapahuken har ei grunnflate på 25 kvadratmeter og er så høg under taket et det skal vera forsvarleg å fyra opp bål inne. Det er brukt solid furumaterial i bygget, som alt er innsett med olje. Til våren skal det behandlast vidare med tjøre og terpentin.

– Me starta med grunnarbeidet i juli. Leiv Inge Flatnes gjorde jobben, og det gjekk med 21 lass med masse, fortel Egil Lokna.

Treng mer i tilskot

Han reknar med at prislappen kjem på rundt 190.000 kroner. Til no har dei fått tilskot på 90.000 kroner. Erko Seafood har bidratt med 25.000 kroner, Sparebankstiftelsen med 40.000, Bua ungdomslag med 10.000 øyremerka til parkeringsplass, Liv & Lyst Bua med 5.000 og Sveio kommune med 10.000.

– Men kommunen tok 7.500 kroner tilbake i form av byggesaksgebyr, bemerkar Egil Lokna.

Smaksprøver

Dei er no i ferd med å søkja om meir midlar, mellom anna innanfor landbruket.

– Det var for lite vatn i bekken til å mala, men me fekk kverna i gang og fekk demonstrert korleis ho fungerer, seier Lokna.

Elles var det kafé med enkel grillmat og smaksprøvar av flatbrød laga av korn frå kverna. Alt dette gjekk føre seg inne i gapahuken.

– Ideen til gapahuken kom opp i samband med den opne dagen. Det er ikkje alltid veret er så bra på denne tida av året, og då er det godt å ha tak over hovudet, seier dei to blide pensjonistane.

Dei ynskjer alle velkomne til å bruka gapahuken, berre dei behandlar byggverket på ein skikkeleg måte.

I samband med den opne dagen arrangerte også Sveio Turlag tur frå Buavåg med 45 deltakarar.

– Opninga blei utsett ein time for å få med alle turgåarane, fortel Lokna.