nyhende
Økonomar trur lønnsveksten blir høgare enn avtalt
Fleire økonomar trur lønnsveksten blir høgare enn den avtalte ramma mellom LO og NHO. Det kan gi den største lønnsveksten sidan 2008 og ei auka styringsrente.
Meklarhusa i Noregs to største bankar spår begge at lønnsveksten i år blir godt over det Noregs Bank la til grunn i mars, skriv Aftenposten.
Seniorøkonom Kyrre Aamdal i DNB Markets trur han blir 5,5 prosent, medan kollegaen hans Kjetil Olsen i Nordea Markets trur den fort kan ende på oversida av dette. I så fall blir dette den høgaste lønnsveksten sidan 2008.
I prognosen sin for styringsrenta frå mars la Noregs Bank til grunn ein vekst i gjennomsnittleg årslønn på 5,1 prosent i år. Sentralbanken kjem med ny renteplan og nytt lønnsanslag 22. juni.
— Denne lønnsveksten bidreg til at prisveksten blir høgare enn det Noregs Bank ventar. Med den kraftige svekkinga av krona i tillegg ventar vi at styringsrenta kjem opp i 4 prosent i haust, seier Olsen. Dette er to ytterlegare renteaukar enn det Noregs Bank spådde i mars.
Sjeføkonom Harald Magnus Andreassen i Sparebank1 Markets er litt meir varsam. Han har oppjustert anslaget sitt for årets lønnsvekst frå 5 prosent til 5,3 prosent.
