Nye vegplanar er ei minimumsløysing meiner grunneigarar

Jubelen sto likevel ikkje i taket blant grunneigarane som følgde debatten i kommunestyret.

— Me er sjølvsagt glade for dei endringane me har fått gjennomslag for. Men dette er ei
minimumsløysing. Me har framleis mange kritiske spørsmål både til prosessen og til planen som ligg føre, seier Ole Andreas Våge. Han har vore grunneigarane sin fremste talsmann under heile planarbeidet.

Egil Misje er endå mindre entusiastisk enn Våge. Dei stiller seg begge framleis uforståande til at ikkje nullalternativet, altså å byggja ny veg der den eksisterande vegen ligg i dag, ikkje er blitt vurdert. Og dei er provoserte over at jordvern og landbruksinteresser blir brukt som argument for å sjå bort frå nullalternativet.

— Med den planen som nå ligg føre, blir fleire gardsbruk delte i to, og driftsbygningane
blir skilde frå innmark. Det er ikkje i landbruket si interesse, seier Misje.

To reguleringsplanar?

Kommunestyret behandla måndag den private detaljreguleringa for Fylkesveg 541 på strekninga Krossleite–Grimstveit. Dette var ei oppfølging av kommunestyretvedtaket frå 4. april 2022, der rådmannen fekk i oppdrag å sjå på mindre justeringar i dialog med grunneigarane.

No la rådmannen saka fram med to alternative forslag til vedtak. Formannskapet behandla innstillinga like før kommuestyremøtet måndag, og involverte også dei partia som ikkje er representerte i formannskapet.

Resultatet blei eit forslag i sju punkt som fekk full støtte i kommunestyret. Forslaget blei først presentert av Rune Teikari (Frp) og deretter av Lars Einar Hollund (H). Håkon Skimmeland (Ap) var også blant dei som tok ordet og la vekt på den tverrpolitiske semja i denne saka.

I vetaket blir rådmannen beden om å starta arbeidet med endring av framlagt planforslag for dei to delstrekningane som er kalla B3 og C2. Det er desse strekningane som vedrører Fresvig sin eigedom og eigedommane langs Lauvåsvegen.

Dersom det er tenleg for framdrifta eller finansieringa, går kommunestyret inn for å dela planen i to reguleringsplanar. Som eit framtidsretta tiltak ber kommunestyret også rådmannen om å setja av eit område i kommuneplanen til bygging av heilt ny veg mellom Fv. 541 og Haukås-området.

Stor trafikk

Denne framtidige vegløysinga skal vera med på å sikra utviklinga i vestre delen av
Sveio og søre delen av Bømlo, samt vera ein omkøyringsveg for E 39 når Trekantsambandet er stengt, heiter det i kommunestyrevedtaket.

I første omgang vil likevel den nye Fv. 541 følgja same trasé som nå forbi Fjellstad og fram til krysset med Fv. 47 ved Krossleite.

— Når fiskerihamna på Bømlo er ferdig, er det snakk om 100 vogntog i døgnet på
strekninga frå Buavåg til Sveio. Det undrar oss at politikarane vil ha denne trafikken gjennom tettbebygd område i Sveio sentrum, seier Våge og Misje, som i si tid foreslo å føra Fv. 541 gjennom tunnel under Sveiåsen og fram til Fv. 47.

Dei stiller seg også undrande til at gamlevegen skal omklassifiserast til kommunal veg.

— Kommunen har ikkje ressursar til å vedlikehalda dei vegane dei alt har ansvaret for,
meiner dei to grunneigarane.

Nøgd — og skuffa

Anne Fresvig, som i fjor sto fram i Vestavind og fortalte om konsekvensane for eigedommen sin dersom den opphavlege reguleringsplanen blei vedteken, fortel om blanda kjensler etter kommunestyrevedtaket.

— Eg er sjølvsagt glad for at eigedommen min er berga. Men grunnen til at me har nådd
fram, er hjelp frå naboane. Me som grunneigarar har stått saman og arbeidd  iherdig. Korkje politikarane eller administrasjonen har hjelpt oss. Me har ikkje fått informasjon om planarbeidet som omfatta våre eigedommar. Det er eg skuffa over, seier Fresvig.