nyhende
Norske meieriprodukt sel som aldri før
Mjølkeforbruket held fram med å auka i første halvår av 2020. Salet av norskprodusert mjølk enda på nær 217 millionar liter. Dette er nesten 2,8 millionar liter høgare enn første halvår i 2019.
Koronakrisa har endra nordmennene sitt syn på mjølk og mjølkeproduksjon, og no går mjølkesalet til himmels. I tillegg får me i oss meir ost og yoghurt enn tidlegare. Det viser ferske salstal frå første halvår, kunngjort i ei pressemelding frå Opplysningskontoret for Meieriprodukter.
– Årsaka til endringane må nok først og fremst tilskrivast at me er meir heime i koronatid. Når folk er meir heime lagar me meir mat frå botnen av og er nærare kjøleskapet og meieriprodukta. Dessutan er det jo nesten slutt på grensehandelen som særleg kan ha innverknad på sal av ost, seier Ida Berg Hauge, direktør i Opplysningskontoret for Meieriprodukter (Melk.no).
Mjølk, ostar og yoghurt
Salet av lettmjølk og heilmjølk har auka høvesvis med 3,7 % og 7% siste halvår. Forbruket av norsk ost har også fått eit oppsving.
Nordmenn fekk i seg 44 millionar kilo norsk ost første halvår, og gulostane, som står for omtrent 60% av ostesalet, auka med heile 4,5%. Også kategoriar som kremost, smøreost og cottage cheese hadde god vekst. Også innan yoghurt har dei norske produkta teke marknadsandelar.
