Næringsareal langs ny E39

Formannskapet i Sveio slutta seg måndag til rådmannen sitt forslag når det gjeld arealreserve og senterstruktur i kommuneplanen 2024-2036. I tillegg vedtok formannskapet nokre tilleggspunkt. Eitt av dei lyder slik:

– I det vidare arbeidet med kommuneplanen sin samfunnsdel knytt til næring, må ny E39 bli tatt med i vurderingane.

Sidan traséen for den nye firefeltsvegen enno ikkje er fastlagt, er det heller ikkje klart kva areal som kan bli aktuelle for næringsføremål.

I eit anna tilleggspunkt heiter det at endeleg vedtak over kva eksisterande og nye område og kategoriar som blir tatt med vidare i den nye kommunenplanen, må først gjerast når det ligg føre ei komplett liste over alle nye innspel som har kome inn.