Multitaska seg til stor bot

Rett før klokka 12 på måndag fekk politiet ei melding om ein bil som vingla i køyrefeltet.

– Ein patrulje låg bak bilen og fekk stoppa den, seier vaktsjef Nina Fagerland ved Haugesund politistasjon.

Årsaka til vinglinga var høgst moderne.

– Førar forklara at vedkomande hadde sett på ein video på mobilen medan føraren køyrde, seier Fagerland.

– Kva slags video?

– Det veit me ikkje, svarar vaktsjefen.

Sjåføren fekk eit førelegg for bruk av mobil, som vert ein bot på 9700 kroner. Hendinga fann stad på E39.