nyhende

Arne Valen og Britt Oddrun Stuve – sekretær og nestleiar i Sveio senterparti – besøkte Fagerland gard fredag for å fokusera på kortreist mat på den internasjonale klimadagen 5. juni. Her i det frodige drivhuset til Annike Aga t.h. der tomatplantane alt har skote høgt i vêret.

Annike Aga dyrkar mange forskjellige salat- og grønsakssortar.

Ein liten flokk løpeender i marknadshagen sørger for at det er fritt for sniglar.

Annike Aga t.v. dyrkar grønsaker etter økologiske prinsipp, og nyttar organisk avfall i produksjonen, til dømes bruk av grøngjødsel og saueull. Britt Oddrun Stuve, nestleiar Sveio senterparti, og Arne Valen, sekretær i Sveio senterparti, er også fokusert på rein og kortreist mat.

Marknadshage med mange gevinstar

Marknadshagen på Fagerland gard, driven av Annike Aga (32), blei anlagt i fjor, og representerer stort mangfald og mange moglegheiter.

Kari Nilsdatter Haukås Kari Nilsdatter Haukås

Publisert 05.06.2021 - 06:00 Sist oppdatert 05.06.2021 - 06:00

Ein marknadshage er småskala grønsaksproduksjon kor produkta vert omsett gjennom marknadskanalar for lokalmat. På eit relativt lite område kan ein produsera svært mykje.

Internasjonal miljødag

Verdas miljødag blir markert 5. juni kvart år. I år handlar dagen om restaurering av økosystem. Me menneske er heilt avhengige naturen rundt oss. Det er frå den me får maten me et; lufta me pustar og sjølve miljøet me bur i. Alt dette blir nå trua av klimaendringar.

Mange av Senterpartiet sine lokallag har tradisjon med å markera Miljødagen, og i Sveio inviterte dei seg sjølve til Fagerland gard for å høyra meir om korleis dei set dette ut i praksis.

Annonse

– Me er alle avhengige av at naturen er i balanse, den er sjølve livsgrunnlaget for oss menneske. Difor er dette eit så viktig tema, fastslår Arne Valen, sekretær i Sveio Senterparti.

Læra av kvarandre

Nestleiaren i lokalpartiet, Britt Oddrun Stuve, synest det er viktig å bruka dei lokale ressursane me har når det gjeld mat. Ho er oppteken av at folk bør laga sine eigne kjøkenhagar, inspirera og læra av kvarandre.

– Eg har inntrykk av at kjøkenhagar er «in» i tida, og at fleire og fleire hiv seg på. Det er ikkje noko som er meir kortreist enn å gå ut ti minuttar før middag og henta ingrediensar i eigen hage, fastslår Stuve.

Annonse

Sauehald og marknadshage

Annike Aga (32), oppvaksen på byggefeltet Fjellstad, har funne seg godt til rette på idylliske Fagerland. Ho ektemannen Bernt André Bjørge overtok garden for seks år sidan, borna deira er fem, åtte og 13 år gamle.

Av husdyr har dei 40 vinterfôra sauer, i tillegg til lam, ein liten andeflokk, katt og hund. Mannen har jobb utanom garden, medan Annike er bondekone på fulltid.

I fjor starta ho opp med marknadshage og produserar grønsaker og poteter til REKO-ringen og private kundar. Ho sel også egg og lammekjøt. På sommaren og hausten også saft av plomme, rips, blåbær og solbærsaft.

Annonse

I følgje Aga blir marknadshagen brukt regenerativt. Det vil blant anna sei at dei tilbakefører organisk materiale til jorda, minimerar jordarbeiding, tilfører eigen kompost og dyregjødsel, grøngjødsel og brukar jorddekke for å bremsa ugras. Dette igjen gir gode vekstvilkår for grønsakene.