Manglar drag på damene

— To-tre damer har vist interesse. Men når ikkje dei andre ville, blei det heller ikkje

innmelding med den tredje. Det er forståeleg. Ei einsleg dame vil ikkje gå inn og bli støttekontakt for alle gubbane, seier Odd Konrad Dale.

Han og Kjell Gunnar Nymark er opptekne av å rekruttera nye medlemmer generelt, og særleg kvinner. Dei skuldar litt på korona-pandemien for at medlemsvervinga har stått litt i stampe de siste par åra. Etter at klubben blei opna for begge kjønn, har det vore svært liten aktivitet lokalt.

— Men me har sikkert vore for lite aktive også, medgir Nymark og Dale, som er sekretær og kasserar i Sveio-klubben. Dale er dessutan kontaktperson for Røde Fjær-aksjonen og soneleiar for Haugalandet. Han har tidlegare vore med i landsstyret for Lions i Norge.

Meiningsfylt

Sjølve meiner dei det er mange grunnar til å bli med i Lions. Nymark, som blei rekruttert for tre år sidan, seier det slik:

— Eg opplever det svært givande å hjelpa andre, både lokalt, nasjonalt og ute i verda.

Lokalt har Sveio Lions Club støtta ruseførebyggande og haldningsskapande arbeid gjennom «BRY DEG RUSS». Dei har gitt bidrag til Sveio frivilligsentral og Kirkens Bymisjon sitt arbeid og hjelpt ein konkret familie i ein vanskeleg livssituasjon, for å nemna noko. I fleire afrikanske land har mange fått livsviktig hjelp gjennom støtte til augehelse og reint drikkevatn.

Nye vinklingar

Sveibuane ser til klubbar i nabokommunane for å henta inspirasjon i arbeidet med å rekruttera fleire kvinner.

— Klubben i Stord og Fitjar har den beste suksesshistoria , som er til inspirasjon for heile

landet. Der lykkast dei truleg fordi dei fekk mange kvinner til å melda seg inn samstundes. Og dei nye medlemmene har verkeleg sett sitt preg på klubbarbeidet. Mellom anna har dei på Stord fleire gonger hatt såkalla «Løvinne for ein kveld»-arrangement der dei har selt brukte klede og fått inn store summar, fortel Dale.

Også andre stader blir det nemnt eksempel på at kvinnene ser nye måtar å arbeida på. Nokre stader er det etablert reine kvinneklubbar. Haugesund Edda var den første kvinneklubben innan Lions i Europa og ein av dei første i verda.

Treng også fleire menn

Sveio Lions Club har i dag 23 medlemmer. På det meste var dei 27.

— Medlemmene har hatt det kjekt i lag. Så kjekt at dei kanskje har gløymt å rekruttera nye og yngre folk til klubbarbeidet. Dei har gløymt å sjå seg i spegelen og leggja merke til at håret er blitt grått og haldninga framoverbøygd, for å seia det slik. I dag er yngste medlem i 40-åra og eldstemann godt over 90. Fleire av dei eldste har falle frå dei siste åra. Derfor hastar det med å få med fleire menn også, seier Nymark og Dale.

Treng bøssebærarar til Røde Fjær

12. og 13. februar blir årets Røde Fjær-aksjon gjennomført over heile landet. Medlemmer av Lions-klubbane og andre frivillige går då med bøsser frå dør til dør. I Sveio treng Lions-klubben hjelp av fleire bøssebærarar, fortel Dale og Nymark.

Som tidlegare år har dei alliert seg med Sveio Idrettslag, og håpar å få god hjelp derfrå. I tillegg til bøssebærarane blir Lions-medlemmer å treffa på nokre av daglegvarebutikkane.

Røde Fjær-aksjonen blir til vanleg arrangert kvart femte år. Den føreståande aksjonen skulle eigentleg vore gjennomført i 2020, men er blitt utsett i to år på grunn av korona.

Målet med årets aksjon er å samla inn 50 millionar kroner til bygging av eit familie-og kompetansehus ved Beitostølen Helsesportssenter i Valdres.

— Den aller første Røde Fjær-aksjonen blei gjennomført i 1966, også den gongen til inntekt for Beitostølen. Resultatet på landsbasis var den gongen 8,6 millionar kroner. Det tilsvarar 96 millionar etter dagens pengeverdi, fortel Dale.

Artisten Erling Stordahl var pådrivar for bygginga av Beitostølen Helsesportssenter, som blei opna i 1970. Lions var ein vesentleg bidragsytar når det gjaldt økonomien. Gjennom dei siste ti åra har også 92 haugalendingar hatt glede av opphald på helssportsenteret, som mellom andre har avtale med Helse Vest. Mellom desse lokale brukarane er åtte frå Sveio, opplyser Nymark og Dale.