nyhende
Lovar musikk og samtale i Valenheimen
Fredag 25. august vert det ei spesiell hending i Valenheimen. Ein musikkvitar kjem for å gå i djupna om Fartein Valen sin musikk, og så skal musikarar spela den.
Bakgrunnen for arrangementet er ei bok om Fartein Valen som kom ut i 2016. Boka «Mennesket – Fartein Valen» vart skriven av arvingen Fartein Valen-Sendestad. Saman med Fartein Valen-stiftinga er han ein aktiv pådrivar for å halda aktivitetar i Valenheimen.
No skal Valen-Sendestad, stiftinga og Sveio kommune halda eit arrangement kor ein går i djupna på komponisten, både mennesket og musikken.
Kven var Fartein Valen?
Til stades for å diskutera komponisten er musikkvitar og pianist Olaf Eggestad. Saman med Valen-Sendestad skal dei snakka om kven Fartein Valen var, før det vert opna for spørsmål frå publikum.
Etterpå kjem meritterte musikarar til å halda konsert med innslag frå fleire berømte komponistar frå Fartein Valen sin tidsperiode. Frå Noregs musikkhøgskule kjem både professor Håvard Gimse og Oskar A. Valand Halvorsen.
Klaver og fiolin
Gimse er rekna som ein av dei beste musikarane i Noreg. Halvorsen har avslutta kandidat-utdanning ved høgskulen og kjem til å framføra ein klaversonate av Fartein Valen, som han tidlegare har fått merksemd for.
Den erfarne kammermusikaren Marianne Thorsen kjem frå NTNU for å spela. Forutan instrument har ho fleire års erfaring som solist for store internasjonale orkester med seg i bagasjen.
