Lovar å passa på frivilligsentralane

Det er stortingsval til hausten. Då kjem gjerne listekandidatar rundt i kommunane, både for å visa seg, og orientera seg om det lokallaget vil løfta fram for dei.

Sveio Senterparti fokuserte på barn og unge, landbruk og bøndene sin situasjon då 1. og 3. kandidat frå Hordaland Senterparti si stortingsliste var innom Sveio onsdag, med besøk på Sveio frivilligsentral, og seinare Einstadbøvoll gard. Vestavind var med då duoen kom til Sveio sambrukshus, der Sveio frivilligsentral har halde til sidan oppstarten for sju år sidan.

Øyremerking er viktig

Kristianne Uri, dagleg leiar for Sveio frivilligsentral, fortalde om både drift og utfordringar.

– Hovudsatsinga er barn og unge, og inkludera dei som er utanfor av psykososiale og økonomiske årsakar. Me skal og inkludera seniorar, og familiar med barn med ulike kulturelle bakgrunnar, seier Uri.

Det viktigaste tilskotet frivilligsentralen får, er frå kommunen, som igjen får øyremerkte midlar frå staten. Frå høgaste politiske hald har det vore snakk om å ta vekk øyremerkinga, og heller gi kommunane tilskot etter kor mange innbyggjarar dei har, eller ta midlane inn i ramma.

Førstnemnde kan føra til at ein liten kommune som Sveio får mindre tilskot, sistnemnde gir lokale politikarar rom for å prioritera annleis.

Avslag på tilskot

Uri fortel at dei har eit godt samarbeid med Sveio kommune, og er trygg på at arbeidet frivilligsentralen gjer blir verdsett, men likevel er endringar i tilskot frå staten eit tema som lurer i bakgrunnen. Ho har ingen garanti for at dei får halda fram som no.

– Me fekk ikkje støtte frå Bufdir til sommaraktivitetar i år. Det er takka vere gåve frå ei privat bedrift, Bremnes Seashore, og gåve frå Sveio Lions me kan ha Drømmesommer i år, seier Uri til stortingskandidatane.

– Eg har fått same type bekymring frå mange andre frivilligsentralar, seier Toppe. Sjølv om Senterpartiet er i mot for mykje øyremerking, er ho for å behalda øyremerkinga til frivilligsentralane. Ho trekk fram at frivilligsentralane verkeleg kan gjera ein skilnad.

Yngre frivillige

Myrvold blei overraska då han høyrer at det er tre tilsette, to av dei i prosjektstilling, for Sveio sine 5800 innbyggjarar, kontra heimkommunen sine 13 000 hovud.

– Eg er imponert. De har større bemanning enn i Kvinnherad, det er godt å høyra at de har eit stort fokus. Frivilligsentralen kan vera eit enkelt tilbod å saldera vekk, men øyremerking er viktig, det er vegen å gå, forsikra Myrvold.

Frivillighetsbarometeret for 2020 seier at det er flest alderspensjonistar som gjer frivillig arbeid. Det står også i stil med stoda i Sveio – ein stor del av bidragsytarane er pensjonistar. Uri er sjølvsagt glad og takksam for alle frivillige på trass av alder, men skulle gjerne hatt kontakt med fleire unge.

– Spesielt er det familiar med ulike kulturelle bakgrunnar som ønskjer kontakt med familiar i Sveio, seier Uri.

Teknologi

Me høyrer med stortingskandidatane om dei har nokre tankar om korleis ein kan leggja til rette for at fleire kan ta del i frivillig arbeid.

– Mange har lyst til å gjera frivillig arbeid, både vaksne og unge vaksne. Kanskje behov kan gjerast kjend gjennom appar for å gjera det lettare tilgjengeleg for folk. Frivilligsentralane kan òg få meir midlar til å gjera rekrutteringsarbeid, seier Toppe.

Myrvold trekk fram at tidsklemma er ein faktor, og trekk fram at teknologi kan gjera terskelen lågare for å gjera frivillig arbeid.

– Og om fleire går fleire i lag, skaper ein eit fellesskap, og pleier venskap på same tid, tipsar 3. kandidaten.