nyhende
Lokal byggebransje samla i nytt forum
Etter initiativ frå byggebransjen har det no blitt laga eit eige forum i Sunnhordland. Sveio kommune er med – her kan også små og store aktørar innan verksemdene entreprenør, bygg og anlegg, plan og arkitektur henga seg på.
Atheno er eit næringsutviklingsselskap på Stord, som kan å bidra til å skapa vekst og utvikling i både kommunar og verksemder. I Sunnhordland jobbast det aktivt med næringsutvikling i seks kommunar, Sveio har vore påkopla i rundt eitt år.
Ønskjer vekst
Onsdag samla Atheno 28 aktørar i lokal byggebransje. Med leiande kommunale representantar frå både Sveio, Bømlo, Fitjar og Stord fekk deltakarane innsikt i kommunane sine framtidige planar for utvikling av bustad- og næringsareal.
Frå Sveio stilte ordførar Linn Therese Erve. Ho var tydeleg på at ho ønskjer vekst i Vestland sin sørlegaste kommune, og var offensiv i sine tankar både når det gjaldt tilrettelegging av attraktive bustadområde og tilgang til gode næringsareal for utbygging, skriv Atheno i ei pressemelding.
God dialog
– For Sveio kommune er det svært viktig å byggja gode bumiljø i eit sterkt sentrum, i tillegg til bygdene. Der må me ha tilgjengelege bustadområder som dekker behovet for innbyggjarar i alle aldrar. Me vil og vise næringslivet at vår gunstige plassering gjer det attraktivt å etablera seg i Sveio. For å få til dette er det avgjerande å ha god dialog med utbyggjarar og næringslivet generelt, fortalde Erve.
Starta samlingar i vinter
Det nye byggfagforumet til Atheno har fått namnet «delA». Det er oppstått i kjølvatnet av samlingane med same namn i vinter, og namnet spelar på ei oppmoding til delingskultur der det er mogleg.
– I vinter hadde me 25 bedrifter frå byggebransjen med på ei større kursrekke for kompetansepåfyll. I etterkant meldte ein samla bransje eit sterkt ynskje og behov for ein meir permanent møteplass, fortel prosjektleiar i Atheno, Ole Jacob Eide.
Næring og kommune
I fagforumet er aktørar innan bygg og anlegg, entreprenør, plan og arkitektur og kommunale aktørar samla. No i starten er det bedrifter som næringsutviklaren har vore i kontakt med som er invitert med, men det er mogleg – og ønskjeleg med fleire.
– Dette er for dei minste og dei største. Tanken er å dela kunnskap og erfaringar, noko Atheno har lang erfaring med. Om nokon ser dette, og har lyst til å bli med, ta kontakt med Atheno. Dette er eit ope fagforum for byggebransjen, som blir eigd av dei sjølve, seier Astrid Kjellevold, dagleg leiar i Atheno.
Fagforumet kjem til å ta ei medlemsavgift etter kvart.
