Kuldesjokket som kan kosta deg dyrt

Mange set båten bort når hausten kjem, men Gjensidige meiner vinteren likevel er ein periode med risiko for både frostskadar, skadar der båten tek inn vatn, og tjuveri av båtmotorar. Selskapet oppmodar båteigarar til å følgje med på båten også når han ikkje er i bruk.

– Medan dei fleste har fått båten trygt på land, let mange båten liggje ute heile året, seier kommunikasjonssjef Arne Voll i ei pressemelding frå Gjensidige.

I Vestland blei det meldt inn 555 båtskadar til Gjensidige i 2025. I oversikta står Sveio oppført med seks skadar. I området rundt er det òg registrert 21 i Bømlo, 22 i Stord, 4 i Etne og 1 i Fitjar.

Gjensidige opplyser samstundes at dei i 2025 har registrert 231 skadar blant båteigarar busette i Vestland, med utbetalingar på 33,6 millionar kroner.

Kulde og is

Gjensidige peikar på at mange skadar i båtsesongen kjem av grunnstøyting.

– Skadane blir dominerte av grunnstøytingar der båtar har gått på eit skjer, land eller køyrt på flytande gjenstandar i sjøen, seier Voll.

Når vinteren kjem, handlar risikoen meir om kulde og is, særleg for båtar som blir liggjande ute.

– Etter lange periodar med streng kulde og stålis er det lite å hente på forsikringa dersom skroget tek skade, seier Voll.

Han meiner òg at frost kan gi skadar på båt eller motor som kan få økonomiske konsekvensar.

– Dersom frost har skada båt eller motor, er det stor fare for at svaret frå forsikringsselskapet blir eit iskaldt avslag, seier han.

Tjuveri i vintermånadene

Tjuveri er eit tilbakevendande problem. Gjensidige seier at nær 20 prosent av skadene deira i Vestland gjeld tjuveri av eller frå båt, ofte i vintermånadene. Snitterstatninga er oppgitt til 60.000 kroner.

Voll åtvarar mot å tru at båten er trygg berre fordi han står på land.

– Mange trur faren er over når båten er på land. I røynda kan vinterlagring på ein usikra hengar vere akkurat det tjuvane ventar på, seier han.

Råd til båteigarar

Gjensidige tilrår jamleg tilsyn gjennom vinteren, anten båten står på land eller ligg på sjøen. Selskapet rår òg til å gjere det vanskelegare å stele motor og utstyr.

1. Merk motoren med Securmark

2. Registrer båten i Småbåtregisteret

3. Sikre båt og motor med vaier og hengelås

4. Monter FG-godkjende attfinning­ssystem, både i båt og på dyrare utanbordsmotorar

5. Ta ut laus bensintank, eller lås han inne

6. Fjern ein viktig motordel eller monter skjult hovudbrytar

7. Bruk helst båthamner som har etablert vakthald

8. Sjekk jamleg at fortøyingar og sikring er i orden