Krigshelt frå Sveio heidra med portrett

Avdukinga skjer dagen før Økland sin fødselsdag. Om han hadde levd, ville han ha fylt 109 år på fredag. Økland døydde 7. desember i fjor.

Initiativ til å laga portrett av Økland blei tatt i 2023 i samband med 80-årsmarkeringa av for «The Battle of the Atlantic» for å heidra krigsseglarane sin innsats under andre verdskrigen. Portrettet er laga av Ross Kolby, som vil vera til stades under avdukinga saman med fylkesordføraren, bergensordførar Marit Warncke, Sjøforsvaret sin sjef Oliver Berdal, Trygve Nøkleby frå Bergens Rederiforening, tidelgare forsvarsminister og leiar for formidlingsprosjektet Anne-Grete Strøm-Erichsen og familie og vener av Økland.

Heider til krigsseglarane

Portrettet vil få permanent plass i publikumsareala i Vestlandshuset for å fortelja om krigsseglanrane under andre verdskrigen til nye generasjonar, heiter det i pressemeldinga frå fylkeskommunen.

– Me er stolte og audmjuke over å få lov til å husa Nils Severin Økland sitt portrett. Me er djupt takknemlege for innsatsen som Nils Severin og dei andre krigsseglarane gjorde for både Noreg og utfallet av krigen. Me tek dei med oss og heidrar dei no med dette maleriet. Me må aldri gløyma kva våre forfedrar ofra for landet, seier fylkesordførar Jon Askeland.

Høgt dekorert

Nils Severin Økland var fødd og vaks opp på Eikeland i Auklandshamn. I 1941 rømde han til Shetland i ei lita motorskøyte saman med ein bror og ein fetter. Deretter gjekk han inn i handelsmarinen og segla som skyttar på ni skip i meir enn 50 konvoiar.

Han er etter krigen blitt heidra med Krigsmedaljen, Deltagermedaljen 9. april 1940 – 8. mai 1945, Haakon VIIs 70-årsmedalje, Regjeringens minnemedalje, Convoy Cup Foundation og Camp Norway Foundation-medaljane, fleire britiske utmerkingar og den franske Æreslegionen.

I 2020, 105 år gammal, debuterte Nils Severin Økland saman med dottera Bjørg Elin Økland med boka «Aldri gi opp». I boka, som blei utgitt av Sveio Kystlag, fortel Økland både om oppveksten, krigsåra og livet til sjøs etter krigen.

Malar krigsheltar

Kunstnaren Ross Kolby har dei siste 12 åra malt ein serie portrett av kjende personar blant anna i samband med andre verdskrigen.  Det gjeld kong Haakon VII, kong Olav V, kong Harald V, Vera Lynn, Wilhelm Mohr, Ingvald Wahl, Gunnar «Kjakan» Sønsteby og Erling Lorentzen.

Han har også portrettert dronning Elizabeth II, eit oppdrag dronninga personleg involverte seg i. Portretta er ein del av boka «Allies», om dei tette banda mellom Noreg og Storbritannia under andre verdskrigen og i dag.