Kan ta i mot 30 nye flyktningar frå Ukraina i år

Det er eitt år sidan krigen mellom Ukraina og Russland byrja. Over åtte millionar har flykta frå landet, og litt under 40 000 av desse til Noreg.

I Sveio har det også kome nokre titals.

Plass til 30 nye

— Kommunen tok i mot 35 flyktningar i fjor. Dei fleste er kvinner og barn, seier Jostein Førre.

Rådmannen i Sveio fortel at kommunestyret har gjort vedtak på å ta i mot 30 nye frå Ukraina i år.

— Det er busett éin flyktning så langt i år, seier Førre.

Han meiner Sveio er godt rusta om det kjem fleire.

— Flyktningtenesta, skule og andre einingar har bygd opp kapasiteten sin for å vera førebudd på å ta i mot nye flyktningar, seier førre.

Treng fleire bustadar

Men, det er eit problem som kommunen må jobba kontinuerleg med.

— Den største utfordringa per i dag er å få tak i bustadar i områder som Sveio sentrum og Førde, seier han.

— Kva er erfaringane så langt med busetting og integrering av dei ukrainske flyktningane?

— Me har gode erfaringar med flyktningane som me har busett i kommunen. På kort tid har barn og unge fått plass i skule og barnehage, medan dei vaksne har starta på norskopplæring og introduksjonsprogram, seier Førre.

Rådmannen er også nøgd med korleis ukrainarane har vorte teken i mot av sveibuene.

— Kommunale einingar, bedrifter, frivillige og innbyggjarar gjer ein god innsats for å integrera flyktningane, seier Førre.