nyhende
Juletrafikken er i gang
Onsdag 22. desember ser ut til å bli den travlaste dagen på flyplassane i landet, men allereie fredag starta rushet for å komme seg heim til jul.
I Bergen er det snakk om over 16.000 reisande, medan over 11.000 reisande blir venta i Trondheim. I Stavanger skal truleg over 9.000 personar reise onsdag.
Julerushet startar før helga
Men mange startar turen allereie fredag, og det blir venta 50.000 passasjerar ved Oslo lufthamn i løpet av dagen.
Totalt mellom 17. og 31. desember blir det anslått at over 590.000 passasjerar skal gjennom Oslo lufthamn. Det er likevel langt unna normalen, seier Kvam.
I same periode i 2019, altså før pandemien, var det 915.000 reisande. Reiseanslaga for årets jul viser dermed ein nedgang på 35 prosent.
Travlast innanlands
Også i år blir dette ei annleis jul, prega av at pandemien er inne i ein ny og svært alvorleg fase, slår Kvam fast. Dei ventar dermed flest reisande innanlands.
– Noreg er eit langt land, og nordmenn skal jo uansett reise for å komme heim til jul, eller besøkje familie, seier han.
Sjølv om trafikken er lågare enn før pandemien, kan kombinasjonen smitteverntiltak og mange reisande med mykje bagasje likevel skape kø.
– Det er derfor lurt å møte opp i god tid og gjere seg klar til tryggingskontrollen før du står der og skal leggje ting i boksane på bandet, seier Kvam.
Dei travlaste tidene i tryggingskontrollen er på morgonen og om ettermiddagen.
Reglar kan endre seg på kort varsel
Kvam oppmodar reisande til å prøve å halde avstand til andre og å følgje påbodet til styresmaktene.
– Som vi har sett dei siste to vekene, kan tilrådingar og reglar frå regjeringa og helsestyresmaktene endre seg på svært kort varsel. Det kan òg vere lokale råd og reglar i tillegg til dei nasjonale. Det er derfor viktig å følgje med på det som gjeld der du flyg til og frå, seier han.
Utanlands varierer reglane frå land til land, og det er den reisande sitt eige ansvar å setje seg inn i kva reglar som gjeld. Ved framkomst til Noreg er regelen grei – alle må teste seg. Ullensaker kommune har eit eige testsenter på Oslo lufthamn.
Ein må òg fylle ut eit innreiseskjema, og Kvam ber folk om å gjere dette før ein står i passkøen.
– Vi ser tendensar til at nokon gløymer dette og må fylle det ut når det er deira tur. Det tek mykje lengre tid for både dei sjølve og dei bak i køen, seier han.
(©NPK)
