nyhende
Jamt bra tilsig til vallokalet
– Eg stemde litt annleis enn eg plar gjera, – men hamna på den retta sida, smiler Sigmund Skard. Meir vil han ikkje sei om den saka når han kjem ut frå vallokalet i Førde.
– Planlegg du sein kveld for å få med deg valresultatet?
Kona Inger Johanne kjem han i forkjøpet.
– Sigmund er A-menneske, så det blir nok ikkje aktuelt å sitja oppe utover natta.
Inger Johanne vil ikkje fortelja kva parti ho stemde på, men avslørar at ho har stemd taktisk for første gong.
– Når me har kome i ein viss alder er det til nye ting som veg tyngre enn før, forklarar ho.
Som alltid
Ein annan valestrending som også er tidleg ute på valdagen, er Jostein Valen.
– I år har eg vore litt i tvil, men nå har eg bestemt meg. Det blir same parti som alltid.
Valen legg til at han er politisk engasjert, og reknar med å følgja med utover kvelden korleis avstemminga blir.
Jamt sig
Stemmestyret i Førde består av i alt fem personar, med leiar og nestleiar, Kristin Hovland og Espen Fosse, i spissen. Dei to hadde dagen før ordna ein del praktiske ting som måtte vera på plass før valkontoret kunne opnast måndag morgon klokka 9 presis.
– Me har hatt eit jamnt sig av folk dei første timane, men det store rushet kjem nok ikkje før i ettermiddag, seier Hovland.
