nyhende
Inviterer til valdebatt på Sjøhuset
Onsdag kveld 25. august, vil Sjøhuset i Buavåg vera ein viktig arena for politisk debatt. Arrangør er Sveio Gullforening.
Åtte parti vil delta i debatten: Arbeidarpartiet, Høgre, Senterpartiet, Framstegspartiet, Kristeleg Folkeparti, Venstre, Sosialistisk Venstreparti og Miljøpartiet dei Grøne.
Kandidatane som stiller er Odd Harald Hovland (2. kandidat til Hordaland Ap), Ove Trellevik (stortingsrepresentant og 2. kandidat til Hordaland Høgre), Nils T. Bjørke (stortingsrepresentant og 2. kandidat til Hordaland Sp), Ruth Grethe Ø. Eriksen, varaordførar i Sveio kommune (FrP), Morten Helland (KrF), Geir Angeltveit (3. kandidat til Hordaland Venstre), Anna Sofie Eikeland Valvatne, Stord (5. kandidat til Hordaland SV). MDG stiller, men det er usikkert kven det blir. Møteleiar er Helge Bua.
Ordveksling og replikkar
Ifølgje leiar i Sveio Gullforening, Asbjørn Bua, startar debatten med at kvart parti får ei innleiing på tre minuttar. Deretter blir det debatt i ca. 30 minuttar med spørsmål til panelet frå møteleiar. Det blir ordveksling og replikkar som møteleiaren styrer.
Etter dette blir det høve til å stilla spørsmål frå publikum. Det blir sett av ca. 30 minuttar til spørsmål og svar frå politikarane. Kvart parti får eitt minutt til avslutning.
Tek opp viktige tema
Tema som blir særskilt vektlagt frå møteleiar er «Partiet ditt» og «Vestlandet».
I samband med dette gjeld det problemstillingar kring næringsliv, distriktspolitikk, samferdsel og landbruk. Korleis ta vare på og skape nye arbeidsplassar? Er det aktuelt å overføre statlege arbeidsplassar? Utnytting av ressursar langs Vestlandet sin lange kyst. Korleis legge grunnlaget for eit godt lokalmiljø? Kva med nærbutikken, skulen og kulturaktivitetar? Miljøspørsmål, tiltak mot forureining langs kysten, og spørsmål vedrørande vindmølleutbygging. Spørsmål som gjeld helse- og velferdspolitikk vil også bli tatt opp.
Arrangementet startar med kafé før paneldebatten.
– Med bakgrunn i koronaregelverket er det plass til ca. 40 personar i tillegg til paneldeltakarar og arrangør. Det vil bli lagt til rette med høgttalarar utandørs for publikum som det ikkje er plass til inne, opplyser Asbjørn Bua på vegne av arrangøren.
