Influensasesongen i fjor var ein vekkjar – no ber FHI eldre vaksinere seg

Over 8.200 vart innlagde på sjukehus med influensa i fjor. Det er langt over normalen for influensarelaterte innleggingar dei siste ti åra. På same tid vart det lagt inn 5.800 med covid-19. Nesten alle desse var i ei risikogruppe.

382 døydde som følgje av influensa og 397 dødsfall kom av covid-19 førre sesong. Nesten alle desse tilhøyrde risikogruppene.

– Det er alltid vanskeleg å føreseie korleis vintersesongane med luftvegssjukdom vil bli. Førre sesong var svært hard med omsyn til alvorleg influensasjukdom, medan han for covid-19 var relativt moderat. Dette kan likevel endre seg til kommande sesong, seier direktør Guri Rørtveit i Folkehelseinstituttet (FHI).

Risikogruppene bør vaksinerast

FHI oppmodar derfor alle i risikogrupper til å ta vaksinar mot influensa, covid-19 og pneumokokksjukdom. Personar med ei rekke kroniske sjukdommar og eldre over 75 år blir oppmoda til å ta alle vaksinane.

Alle over 65 år bør ifølgje FHI ta vaksine mot influensa og pneumokokksjukdom.

Gravide i 2. og 3. trimester bør ta vaksine mot influensa i tillegg til vaksinen mot kikhoste. Og barn i risikogrupper får tilbod om influensavaksine.

– Behandlande lege og anna helsepersonell må sørgje for at føresette får informasjon om influensavaksinasjon, og kommunane må leggje til rette for vaksinasjon av barn, seier direktør Guri Rørtveit i FHI.

Oppmoding til helsetilsette

Helsedirektoratet oppmodar samtidig alle tilsette i helsetenesta med pasientkontakt til å ta årets influensavaksine. Også FHI oppmodar til dette.

– Vi veit at helsepersonell og andre tilsette i helsetenesta er utsette for smitte. Helsepersonell som tek vaksine, vernar sårbare pasientar og pasientgrupper, reduserer risikoen for å bli sjuke og for å smitte pasientar, seier avdelingsdirektør Knut Berglund i Helsedirektoratet i ei pressemelding.

Dei skriv at ved å vaksinere deg bidreg du til å redusere smittespreiing og sikre tryggare helseteneste gjennom influensasesongen.

– Helsepersonell behandlar og har omsorg for mange i risikogruppene, som eldre og barn i risikogruppene. Desse må vi verne. Det er viktig å redusere risikoen for å bere smitte til pasientane på jobb, seier Berglund.

Yngre i risikogrupper er dårlegare til å ta vaksine

Tal frå Statistisk sentralbyrå (SSB) viser at yngre i risikogrupper og helsepersonell er dårlegare til å ta vaksine.

Berre 21 prosent i risikogrupper under 64 år rapporterer at dei har teke vaksine mot korona. I den same gruppa har 39 prosent tekne influensavaksine.

Helsepersonell oppgir at berre 51 prosent har teke influensavaksinen, som dei blir oppmoda til å ta.

For dei som er 65 år og eldre, har 70 prosent teke influensavaksine og 53 prosent koronavaksine.

Tala viser også at personar med lågare utdanning er dårlegare til å vaksinere seg.