nyhende
Høgsesong for nabokonfliktar
Fleire enn ein av tre innbyggjarar i Vestland har vore i konflikt med naboen. Seinsommaren og hausten er høgsesong for nabokrangel, viser ei undersøking som forsikringsselskapet Gjensidige har fått gjennomført.
Rot og søppel, høg musikk, hundar som bjeffar, parkeringsforhold, fellesområde og beplanting er dei vanlegaste årsakene til konflikt, går det fram av undersøkinga.
– Årsaka til at talet på konfliktsaker aukar etter ferien, er at ein del ser sitt snitt til å få gjort unna omstridde prosjekt medan naboen er bortreist på ferie, heiter det i pressemeldinga.
Ifølge Gjensidige si undersøking svarar 35 prosent av innbyggjarane i Vestland ein eller fleire gonger har vore i konflikt med naboane sine.
Verre på Austlandet
– Det verkar som me er litt fredelegare her vest enn på det sentrale Austlandet. Der seier opp mot 45 prosent at dei har opplevd konfliktar med naboane. Kanskje skuldast det at dei bur tettare der, seier kommunikasjonssjef Arne Voll ved Gjensidige sitt kontor i Bergen.
Dette kan også vera grunnen til at folk i gamle Hordaland, inkludert Bergen er litt meir kranglevorne enn innbyggjarane i gamle Sogn og Fjordane. Prosentsatsen i Hordaland er nemleg 37, og i Sogn og Fjordane 34. Til samanlikning er Innlandet nede i berre 22 prosent.
Undersøkinga oppgir ikkje tale på kommunenivå. Under føresetnad av at Sveio ligg på gjennomsnittet for heile Vestland, kan bortimot 2.000 innbyggjarar i kommunen ha vore i konflikt med grannelaget sitt.
Oppfordrar til dialog
– Det skal ikkje alltid så mykje til, seier Voll, som oppmodar folk til å pusta med magen, vera løysingsorienterte og innstilte på å medverka til gode kompromissløysingar.
Det er først og fremst i og omkring eigedomsgrensene konfliktane oppstår. I pressemeldinga blir det nemnt ei rekkje eksempel. Det kan vera graving på naboen sin eigedom eller garasjebygg som blir plasserte på naboeigedommen. Det kan handla om parkeringsrettar, hekkar som hindrar utsikt, vegarbeid som fører til at overvatn renn inn på naboen si tomt, kostnadsfordeling eller korleis arbeidet med snømåking skal fordelast.
Rettshjelp er inkludert i reise-, hus- og innbuforsikringane, og forsikringsselskapa blir kontakta dersom nabokrangelen fører til at partane må ha hjelp av advokat og der tvistane endar i rettssystemet. I snitt kostar nabotvistar rundt 40.000 kroner, men enkeltsaker kan bli langt dyrare, heiter det i pressemeldinga.
