nyhende
Høgaste talet på bortleggingar på ti år i 2023
298.000 saker vart ferdig etterforska i fjor. 179.000 av desse vart lagde bort, det høgaste talet på ti år. Og fleire barn blir sikta for vald, ifølgje SSB
Politiet avslutta etterforskinga for 6,6 prosent fleire saker i 2023 enn året før, viser tal frå Statistisk sentralbyrå (SSB). Andelen uoppklarte lovbrot auka med 12,3 prosent frå året før.
Rundt 119.000 saker blir rekna som oppklart, som svarer til 40 prosent. Det er mykje lågare enn dei to tidlegare åra, og den lågaste andelen sidan slutten av 90-talet.
Politiet har oppklart rundt 25.000 færre narkotikalovbrot dei siste ti åra. Talet på uoppklara bedrageri har auka med 8000. I fjor var det i alt 87.200 uoppklara eigedomstjuveri, som mellom anna omfattar tjuveri i bustader og frå privatpersonar, som er heile 41 prosent fleire enn i 2021.
Fleire tjuveri melde i fjor
Statistikken over meldingar viser at det har vore betydeleg fleire tjuveri, bedrageri og skadeverk i 2023 enn i 2022.
Det er likevel ikkje berre endringar i kriminalitetsbiletet som har noko å seie for oppklaringsprosenten. Andelen oppklarte saker er færre innan dei aller fleste lovbrota dei siste to åra, påpeikar SSB.
46.200 lovbrot enda i fjor med tiltale og avgjerd i domstolane, og 39.600 lovbrot resulterte i førelegg frå påtalemakta. Samla sett er det 4,2 prosent færre enn i 2022 og heile 35,8 prosent færre enn i 2016.
Auke blant barn og unge
4,7 prosent av alle oppklarte saker i 2023 er lagt bort fordi gjerningspersonen var for ung til å kunne bli straffa.
4.600 barn vart i 2023 sikta for lovbrot gjort før dei fylte 15 år. Det er godt over dobbelt så mange samanlikna med åra 2013–2016 – då færrast barn vart tekne for lovbrot. Dette er også meir enn i toppåra 2007–2009.
Nesten 27 prosent fleire 13- og 14-åringar er tekne for eigedomstjuveri i 2023 samanlikna med året før, hovudsakleg mindre butikktjuveri.
Fleire barn blir sikta for vald
1.135 barn i alderen 13–14 år er sikta for vald og mishandling – mellom anna 646 for fysiske valdslovbrot, 203 for truslar, 163 for omsynslaus åtferd og 117 for ran og utpressing.
I den siste tiårsperioden har andelen 13-14-åringar som blir sikta for vald og mishandling, auka markant. Dette har medført at alderstrinna 13 og 14 år no har dei høgaste andelane av gjerningspersonar sikta for vald og mishandling.
