Ho er ny kreftkoordinator i Sveio

Ein ny kreftkoordinator er tilsett i Sveio, og namnet kan vere kjent for fleire.

Solveig Gravelsæter jobbar nemleg allereie 50 prosent som leiar for helsestasjon for seniorar i kommunen.

No skal ho også hjelpe sveibuar råka av kreft, også det i ei 50 prosent stor stilling.

I stillinga skal ho i hovudsak gjere tre ting. Vere kontaktperson i høve til tenester knytta til kreftsjukdom, tilrettelegging av kvardagen for kreftsjuke og pårørande, og bidra til eit godt system og rutinar for kreftomsorga i kommunen.

— Brei kompetanse

For nokre månader sidan vart stillinga lyst ut internt i Sveio kommune, og det vart to søkarar.

Gravelsæter er eit godt val, fortel Ingunn Toft, kommunalsjef for helse og omsorg.

— Ho har brei og god kompetanse innan fagfeltet, og eit stort engasjement, seier Toft.

Kreftkoordinator er ikkje ei ny stilling, men tidlegare har det vore oppgåva til den fagansvarlege i heimetenesta

Meir synleg

Årsaka til endringa er ifølgje Toft at tilbodet skal verte meir synleg.

— Me ser eit behov for tydelegare organisering, der dette viktige arbeidet vert meir tilgjengeleg for innbyggarane, seier Toft.

Gravelsæters nye stilling som kreftkoordinator har ikkje noko å gjere med hennar rolle i helsestasjon for seniorar.

— Stillinga vil kunne ha nokre samanfallande oppgåver, men kreft kan ramme menneske i alle aldrar, seier Toft

Gravelsæter tiltrer den nye stillinga den 27. mars.